అమరావతిలో ఎమ్మెల్యే, ఎమ్మెల్సీ భవన సముదాయం ప్రారంభం.. సీఆర్డీఏ నుంచి జీఏడీకి అప్పగింత

అమరావతి రాజధాని నిర్మాణంలో మరో కీలక ముందడుగు పడింది. రాజధాని ప్రాంతం రాయపూడిలో నిర్మించిన ఎమ్మెల్యే, ఎమ్మెల్సీల నివాస భవన సముదాయాన్ని ముఖ్యమంత్రి చంద్రబాబు నాయుడు ప్రారంభించారు. గురువారం జరిగిన కార్యక్రమంలో సీఆర్డీఏ నిర్మాణం పూర్తి చేసిన భవన సముదాయాన్ని సాధారణ పరిపాలన శాఖకు (జీఏడీ) అధికారికంగా అప్పగించింది. ఈ సందర్భంగా ముఖ్యమంత్రి చంద్రబాబు నాయుడు మంత్రులు నారాయణ, నాదెండ్ల మనోహర్‌లతో కలిసి నూతన భవనాలను పరిశీలించారు. ఎమ్మెల్యేలు, ఎమ్మెల్సీల కోసం రాయపూడి వద్ద మొత్తం 12 టవర్లుగా ఈ నివాస సముదాయాన్ని నిర్మించారు. ఇందులో 288 ఫ్లాట్లు ఉన్నాయి. ఒక్కో ఫ్లాట్‌ సుమారు 3,500 చదరపు అడుగుల విస్తీర్ణంతో అత్యాధునిక వసతులతో రూపొందించారు. భవనాల మధ్య ప్రత్యేక లాన్స్‌, సౌకర్యవంతమైన ప్రాంగణాలను ఏర్పాటు చేశారు. రాజధాని ప్రాంతంలో ప్రజాప్రతినిధులకు అవసరమైన నివాస సదుపాయాలను అందించే లక్ష్యంతో ఈ నిర్మాణాలను చేపట్టారు. భవనాల అప్పగింత అనంతరం వాటి నిర్వహణ బాధ్యతలను సాధారణ పరిపాలన శాఖ పర్యవేక్షించనుంది. ప్రభుత్వం రూపొందించే విధానానికి అనుగుణంగా భవనాల్లోని ఫ్లాట్లను ఎమ్మెల్యేలు, ఎమ్మెల్సీలకు కేటాయించే ప్రక్రియ ప్రారంభం కానుంది. అమరావతిలో ప్రభుత్వ, ప్రజాప్రతినిధుల మౌలిక వసతుల అభివృద్ధిలో భాగంగా ఈ భవన సముదాయం కీలకంగా మారనుంది. రాజధాని నిర్మాణ పనులు క్రమంగా వేగం పుంజుకుంటున్న నేపథ్యంలో ఈ ప్రారంభోత్సవానికి ప్రాధాన్యత ఏర్పడింది.