కెమెరా పట్టిన సీఎం.. ఫొటో జర్నలిస్టులతో చంద్రబాబు సందడి

వరల్డ్ ఫొటోగ్రఫీ డే సందర్భంగా ఆంధ్రప్రదేశ్ ముఖ్యమంత్రి చంద్రబాబు నాయుడు ఫొటో జర్నలిస్టులతో ప్రత్యేకంగా మమేకమయ్యారు. అసెంబ్లీ ప్రాంగణంలో బుధవారం ఫొటో జర్నలిస్టులను కలిసిన సీఎం.. వారికి ప్రపంచ ఫొటోగ్రఫీ దినోత్సవ శుభాకాంక్షలు తెలిపారు. ఈ సందర్భంగా చంద్రబాబు నాయుడు స్వయంగా కెమెరా పట్టుకుని ఫొటో జర్నలిస్టుల గ్రూప్ ఫొటో తీశారు. సాధారణంగా రాజకీయ కార్యక్రమాలను కవర్ చేసే ఫొటోగ్రాఫర్లను ఈసారి సీఎం స్వయంగా ఫొటో తీయడం ప్రత్యేక ఆకర్షణగా నిలిచింది. ఫొటోగ్రఫీ రంగం ప్రాధాన్యతను చంద్రబాబు వివరించారు. చరిత్రలో చోటుచేసుకునే ముఖ్యమైన సంఘటనలను, ప్రజల జీవితాల్లోని కీలక సందర్భాలను చిత్రాల రూపంలో భద్రపరచడంలో ఫొటోగ్రాఫర్ల పాత్ర ఎంతో ముఖ్యమని అన్నారు. మానవ అనుభవాలను అద్భుతమైన చిత్రాలుగా ఆవిష్కరించే ఫొటోగ్రాఫర్లకు సీఎం అభినందనలు తెలిపారు. మీడియా, ప్రొఫెషనల్ ఫొటోగ్రాఫర్లను కలవడం గౌరవంగా భావిస్తున్నానని పేర్కొన్నారు. ఫొటో జర్నలిస్టుల అంకితభావం, కళాత్మకత, నిరంతర కృషి ప్రశంసనీయమని చంద్రబాబు అన్నారు. అనేక సందర్భాల్లో మాటల్లో చెప్పలేని కథలకు ఫొటోలు గొంతుకగా నిలుస్తాయని వివరించారు. ఒక ఫొటో కేవలం ఒక చిత్రం మాత్రమే కాదని, అది ఒక కాలానికి సంబంధించిన జ్ఞాపకమని సీఎం పేర్కొన్నారు. భవిష్యత్ తరాలకు చరిత్రను అర్థం చేసుకునేందుకు చిత్రాలు ఎంతో ఉపయోగపడతాయని తెలిపారు. వరల్డ్ ఫొటోగ్రఫీ డే సందర్భంగా ప్రపంచవ్యాప్తంగా ఉన్న ఫొటోగ్రాఫర్లకు చంద్రబాబు శుభాకాంక్షలు తెలిపారు. ప్రజలకు సమాచారం, స్ఫూర్తి అందించేలా మరిన్ని చిరస్మరణీయ క్షణాలను కెమెరాల్లో బంధించాలని ఆకాంక్షించారు. ఈ మేరకు సీఎం చంద్రబాబు సామాజిక మాధ్యమం ఎక్స్‌లో ఫొటోగ్రఫీ రంగంపై తన అభిప్రాయాలను పంచుకున్నారు.