సికింద్రాబాద్‌ ఉజ్జయిని మహంకాళి ఆలయంలో సీఎం రేవంత్‌ ప్రత్యేక పూజలు

తెలంగాణ ముఖ్యమంత్రి రేవంత్‌ రెడ్డి ఆదివారం సికింద్రాబాద్‌లోని ఉజ్జయిని మహంకాళి ఆలయానికి వెళ్లారు. బోనాల ఉత్సవాల సందర్భంగా అమ్మవారికి పట్టువస్త్రాలు సమర్పించి ప్రత్యేక పూజలు నిర్వహించారు. ఆలయ అర్చకులు ముఖ్యమంత్రికి సంప్రదాయ స్వాగతం పలికి ఆశీర్వచనాలు అందించారు. మంత్రులు కొండా సురేఖ, పొన్నం ప్రభాకర్‌, సీతక్కతోపాటు పలువురు ఎమ్మెల్యేలు, ఎమ్మెల్సీలు, ఇతర ప్రజాప్రతినిధులు కార్యక్రమంలో పాల్గొన్నారు. తెలంగాణ ప్రభుత్వం తరఫున అమ్మవారికి తొలి బోనాన్ని మంత్రి పొన్నం ప్రభాకర్‌ సమర్పించారు. బోనాలు సమర్పించేందుకు మహిళలు, భక్తులు పెద్ద సంఖ్యలో ఆలయానికి తరలివచ్చారు. సంప్రదాయ దుస్తుల్లో బోనాలు తీసుకువచ్చిన మహిళలు ప్రత్యేక పూజలు నిర్వహించారు. భక్తుల జయజయధ్వానాలు, డప్పు చప్పుళ్లు, పోతరాజుల విన్యాసాలతో సికింద్రాబాద్‌ పరిసరాల్లో పండుగ వాతావరణం కనిపించింది. లక్షల మంది భక్తులు వచ్చే అవకాశం ఉందని అధికారులు అంచనా వేశారు. రద్దీని నియంత్రించేందుకు సాధారణ భక్తుల దర్శనం కోసం మూడు ప్రత్యేక క్యూ లైన్లు ఏర్పాటు చేశారు. బోనాలు సమర్పించేందుకు వచ్చిన భక్తుల కోసం మరో రెండు క్యూ లైన్లను అందుబాటులో ఉంచారు. క్తుల భద్రత కోసం ఆలయం, ప్రధాన రహదారులు, ప్రవేశ మార్గాలు, క్యూ లైన్ల వద్ద పోలీసులను మోహరించారు. సీసీటీవీ కెమెరాల ద్వారా ఆలయ పరిసరాల్లో నిరంతర నిఘా కొనసాగిస్తున్నారు. రద్దీ ప్రాంతాల్లో ట్రాఫిక్‌కు అంతరాయం కలగకుండా అవసరమైన మార్గమళ్లింపు చర్యలు చేపట్టారు. ఆలయానికి వచ్చే భక్తులకు తాగునీటి సమస్య తలెత్తకుండా ప్రత్యేక వాటర్‌ క్యాంపులు ఏర్పాటు చేశారు. వైద్య ఆరోగ్యశాఖ ఆధ్వర్యంలో హెల్త్‌ క్యాంపులు నిర్వహిస్తున్నారు. అత్యవసర పరిస్థితుల్లో తక్షణ వైద్య సహాయం అందించేందుకు అంబులెన్స్‌లను సిద్ధంగా ఉంచారు. భక్తులు క్రమశిక్షణ పాటించి క్యూ లైన్ల ద్వారా దర్శనానికి వెళ్లాలని అధికారులు సూచించారు. చిన్నపిల్లలు, వృద్ధులు, ఆరోగ్య సమస్యలున్న వారి విషయంలో ప్రత్యేక జాగ్రత్తలు తీసుకోవాలని కుటుంబ సభ్యులకు విజ్ఞప్తి చేశారు. అన్ని ప్రభుత్వ విభాగాలు సమన్వయంతో పనిచేస్తూ బోనాల ఉత్సవాలను సజావుగా నిర్వహిస్తున్నాయి.