గన్నవరం నుంచి వారణాసి, కోల్‌కతాకు కొత్త విమాన సర్వీసులు ప్రారంభం

విజయవాడ గన్నవరం విమానాశ్రయం నుంచి కొత్త విమాన సర్వీసులు ప్రారంభమయ్యాయి. వారణాసి, కోల్‌కతా నగరాలకు నేరుగా విమాన సేవలను ప్రముఖ విమానయాన సంస్థ ఇండిగో ప్రారంభించింది. కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు ఢిల్లీ నుంచి వర్చువల్‌గా ఈ సర్వీసులను ప్రారంభించారు. ఈ కొత్త సేవలతో ఆంధ్రప్రదేశ్‌ ప్రయాణికులకు ఉత్తర, తూర్పు భారత ప్రాంతాలకు రాకపోకలు మరింత సులభతరం కానున్నాయి. ఇండిగో సంస్థ ప్రకటించిన షెడ్యూల్‌ ప్రకారం వారంలో మూడు రోజులు ఈ విమానాలు అందుబాటులో ఉంటాయి. ప్రతి మంగళవారం, గురువారం, శనివారం గన్నవరం నుంచి వారణాసి, కోల్‌కతాకు విమానాలు నడుస్తాయి. వారణాసి నుంచి విజయవాడకు వచ్చే 6E 6501 విమానం మధ్యాహ్నం 3:55 గంటలకు బయలుదేరి సాయంత్రం 5:50 గంటలకు గన్నవరం చేరుకుంటుంది. విజయవాడ నుంచి వారణాసికి వెళ్లే 6E 6502 విమానం సాయంత్రం 6:20 గంటలకు బయలుదేరి రాత్రి 8:15 గంటలకు వారణాసి చేరుకుంటుంది. అనంతరం అదే విమానం వారణాసి నుంచి కోల్‌కతాకు కొనసాగుతుంది. తిరుగు ప్రయాణంలో 6E 6501 విమానం కోల్‌కతా నుంచి మధ్యాహ్నం 2:10 గంటలకు బయలుదేరి వారణాసి మీదుగా సాయంత్రం 5:50 గంటలకు విజయవాడ చేరుకుంటుంది. గన్నవరం విమానాశ్రయం నుంచి కొత్త మార్గాలు ప్రారంభం కావడం వల్ల వ్యాపార, పర్యాటక, ఆధ్యాత్మిక ప్రయాణాలకు మరింత ప్రోత్సాహం లభించనుంది. ముఖ్యంగా వారణాసి వంటి ప్రముఖ ఆధ్యాత్మిక కేంద్రానికి నేరుగా కనెక్టివిటీ రావడం భక్తులకు కూడా ఉపయోగకరంగా మారనుంది.