నిరుద్యోగులకు గుడ్ న్యూస్.. గ్రూప్-1లో కొత్త సర్వీసులు

ఆంధ్రప్రదేశ్‌లోని నిరుద్యోగ యువతకు ప్రభుత్వం శుభవార్త అందించింది. రాష్ట్రంలో త్వరలో జాబ్ క్యాలెండర్ ప్రకటించేందుకు కూటమి ప్రభుత్వం కసరత్తు చేస్తున్న నేపథ్యంలో ఏపీపీఎస్సీ గ్రూప్-1 సర్వీసుల విషయంలో కీలక మార్పులు చేసింది. డైరెక్ట్ రిక్రూట్‌మెంట్ కోసం గ్రూప్-1 సర్వీసులో మరిన్ని పోస్టులను చేర్చుతూ ప్రభుత్వం ఉత్తర్వులు జారీ చేసింది. ప్రభుత్వం తీసుకున్న తాజా నిర్ణయం ప్రకారం డివిజనల్ డెవలప్‌మెంట్ ఆఫీసర్ (ఏపీ పంచాయతీరాజ్, గ్రామీణాభివృద్ధి), జిల్లా అగ్నిమాపక అధికారి (ఏపీ ఫైర్ సర్వీసెస్), అసిస్టెంట్ డైరెక్టర్, ప్రాజెక్టు అధికారి (ఏపీ అడల్ట్ ఎడ్యుకేషన్ సర్వీసెస్), డిప్యూటీ సూపరింటెండెంట్ ఆఫ్ పోలీస్ (కమ్యూనికేషన్స్) (ఏపీ పోలీస్ సర్వీస్), జిల్లా విద్యాశాఖాధికారి (ఏపీ ఎడ్యుకేషన్ సర్వీస్) పోస్టులను గ్రూప్-1 సర్వీసులో చేర్చారు. ఈ మార్పులతో ఏపీపీఎస్సీ గ్రూప్-1 సర్వీసులోని పోస్టుల సంఖ్య 22కి చేరింది. అదే సమయంలో మండల ప్రజాపరిషత్ డెవలప్‌మెంట్ ఆఫీసర్ పోస్టును గ్రూప్-1 సర్వీస్ జాబితా నుంచి తొలగించారు. ఏపీపీఎస్సీ నిర్వహించే గ్రూప్-1 సర్వీస్ రిక్రూట్‌మెంట్‌లో ఈ కొత్త క్లాసిఫికేషన్ వర్తిస్తుందని ప్రభుత్వం స్పష్టం చేసింది. నిరుద్యోగ యువతకు మరిన్ని ప్రభుత్వ ఉద్యోగ అవకాశాలు అందుబాటులోకి వచ్చే అవకాశం ఉండటంతో ఈ నిర్ణయం ప్రాధాన్యత సంతరించుకుంది. రాష్ట్రంలో ఉద్యోగాల కోసం ఎదురుచూస్తున్న అభ్యర్థులు జాబ్ క్యాలెండర్‌తో పాటు ఏపీపీఎస్సీ నుంచి వెలువడే అధికారిక నోటిఫికేషన్లను గమనించడం ద్వారా తాజా నియామక వివరాలను తెలుసుకోవచ్చు.