భారీ వర్షాలు, వరదలపై సీఎం చంద్రబాబు సమీక్ష.. మత్స్యకార కుటుంబాలకు ఉచిత బియ్యం

రాష్ట్రంలో ఇటీవల కురుస్తున్న భారీ వర్షాలు, ముఖ్యంగా ఉత్తరాంధ్రలో నెలకొన్న వరద పరిస్థితులపై ముఖ్యమంత్రి చంద్రబాబు నాయుడు అధికారులతో సమీక్ష నిర్వహించారు. శనివారం నిర్వహించిన టెలికాన్ఫరెన్స్‌లో పలు జిల్లాల్లో ఏర్పడిన పరిస్థితులు, ప్రజలకు అందుతున్న సహాయక చర్యలు, పంట నష్టం, పునరావాస ఏర్పాట్లపై చర్చించారు. ఈ సమావేశంలో సీఎస్‌ సాయిప్రసాద్‌తో పాటు పలువురు ఉన్నతాధికారులు పాల్గొన్నారు. వర్షాల కారణంగా నివాస ప్రాంతాలు నీట మునిగిన ప్రాంతాల్లో చేపడుతున్న సహాయక చర్యలను అధికారులు ముఖ్యమంత్రికి వివరించారు. ముంపు ప్రాంతాల్లో ప్రజలకు అవసరమైన సౌకర్యాలు కల్పించాలని, పునరావాస కార్యక్రమాలను వేగవంతం చేయాలని సీఎం సూచించారు. గత ఐదు రోజులుగా సముద్రంలోకి వేటకు వెళ్లలేక ఇబ్బందులు పడుతున్న మత్స్యకార కుటుంబాలకు ప్రభుత్వం తరఫున సహాయం అందించాలని ముఖ్యమంత్రి ఆదేశించారు. ప్రతి కుటుంబానికి ఉచితంగా 50 కిలోల బియ్యం అందించేలా చర్యలు తీసుకోవాలని అధికారులను ఆదేశించారు. వర్షాలు, సముద్ర పరిస్థితుల కారణంగా జీవనోపాధి కోల్పోయిన మత్స్యకారులకు అవసరమైన సహాయం అందించాలని సూచించారు. ఉత్తరాంధ్రలో నదుల ప్రవాహాలు, వరద పరిస్థితులను మంత్రి అచ్చెన్నాయుడు ముఖ్యమంత్రి దృష్టికి తీసుకువచ్చారు. ఆయా జిల్లాల్లోని రిజర్వాయర్లలో నీటి ప్రవాహాలు, నీటి నిల్వ పరిస్థితులపై ఇరిగేషన్ అధికారులు వివరాలు అందించారు. ఈ సందర్భంగా హీర మండలం లిఫ్ట్‌ ప్రాజెక్టుపై ముఖ్యమంత్రి ప్రత్యేకంగా చర్చించారు. ప్రాజెక్టుకు విద్యుత్‌ సౌకర్యం కల్పించే ప్రక్రియను వేగవంతం చేయాలని ఆదేశించారు. ఇరిగేషన్‌, విద్యుత్‌ శాఖల అధికారులు సమన్వయంతో పనిచేసి పనులను త్వరగా పూర్తి చేయాలని సూచించారు. లిఫ్ట్‌ ప్రాజెక్టు పనులు పూర్తయిన తర్వాత వంశధార నీటిని హీర మండలం రిజర్వాయర్‌లోకి తరలించేలా చర్యలు తీసుకోవాలని తెలిపారు. రాష్ట్రంలోని పలు రిజర్వాయర్లలో నీటి నిల్వలను పెంచేందుకు తీసుకుంటున్న చర్యలపై కూడా ముఖ్యమంత్రి అధికారులతో మాట్లాడారు. కృష్ణా నదిలో ఎగువ ప్రాంతాల నుంచి పెద్దగా ప్రవాహాలు లేకపోయినా, స్థానికంగా వస్తున్న వరద నీటి కారణంగా ప్రకాశం బ్యారేజీ వద్ద నీటి మట్టం పెరిగిందని అధికారులు వివరించారు. స్థానికంగా వచ్చే వరద నీటిని పూర్తిస్థాయిలో వినియోగించుకునేందుకు పులిచింతల దిగువన, ప్రకాశం బ్యారేజీ ఎగువన కొత్త బ్యారేజీల నిర్మాణం అవసరమని సీఎం పేర్కొన్నారు. గతంలో చేసిన ప్రతిపాదనలను ముందుకు తీసుకెళ్లాలని, ఈ రెండు ప్రాజెక్టులకు సంబంధించి కేంద్ర ప్రభుత్వానికి ప్రతిపాదనలు పంపాలని అధికారులకు సూచించారు. తాజా వర్షాల కారణంగా రాష్ట్రంలో వర్షపాతం లోటు తగ్గినట్లు అధికారులు ముఖ్యమంత్రికి వివరించారు. గతంలో 50 శాతంగా ఉన్న లోటు ప్రస్తుతం 31 శాతానికి తగ్గిందని తెలిపారు. కోస్తాంధ్రలో 19.80 శాతం, రాయలసీమలో 42 శాతం వర్షపాతం లోటు ఉన్నట్లు అధికారులు వెల్లడించారు. ప్రస్తుతం రాష్ట్రంలో వర్షాలు తగ్గుముఖం పట్టినప్పటికీ ఉత్తరాంధ్రలో ఎగువ ప్రాంతాల నుంచి నదుల్లోకి ప్రవాహాలు కొనసాగుతున్నాయని అధికారులు వివరించారు. వరద ప్రభావిత ప్రాంతాల్లో నిరంతరం పరిస్థితిని పర్యవేక్షించాలని, ప్రజలకు ఎలాంటి ఇబ్బందులు లేకుండా చర్యలు తీసుకోవాలని ముఖ్యమంత్రి ఆదేశించారు.