తుపాన్ అలర్ట్.. శ్రీకాకుళం జిల్లాలో పాఠశాలలు, అంగన్వాడీ కేంద్రాలకు సెలవులు

ఆంధ్రప్రదేశ్‌లోని శ్రీకాకుళం జిల్లాలో తుపాన్ ప్రభావంతో వాతావరణ పరిస్థితులు మారడంతో జిల్లా యంత్రాంగం అప్రమత్తమైంది. భారీ వర్షాల నేపథ్యంలో విద్యార్థుల భద్రతను దృష్టిలో ఉంచుకుని పాఠశాలలు, అంగన్వాడీ కేంద్రాలకు సెలవులు ప్రకటించారు. జిల్లా కలెక్టర్ స్వప్నిల్ దినకర్ పుడ్కర్ ఈ నిర్ణయం తీసుకున్నారు. శ్రీకాకుళం జిల్లాలో ఇప్పటికే ముసురు వాతావరణం నెలకొంది. తుపాన్ ప్రభావంతో వర్షాల తీవ్రత పెరిగే అవకాశం ఉందని వాతావరణ పరిస్థితులను అధికారులు అంచనా వేస్తున్నారు. ముఖ్యంగా మధ్యాహ్నం తర్వాత వర్షాలు మరింత ఎక్కువయ్యే అవకాశం ఉందని సమాచారం. ఈ పరిస్థితుల్లో విద్యార్థులు, చిన్నారుల రక్షణకు ప్రాధాన్యం ఇస్తూ విద్యాసంస్థలకు సెలవులు ప్రకటించారు. స్థానిక పరిస్థితులను బట్టి అవసరమైన చర్యలు తీసుకోవాలని ఎంఈఓలకు అధికారులు సూచించారు. ప్రతి ప్రాంతంలో వర్షాల తీవ్రత, రవాణా పరిస్థితులు, విద్యార్థుల ప్రయాణ ఇబ్బందులను పరిశీలించి చర్యలు తీసుకోవాలని ఆదేశించారు. తుపాన్ ప్రభావంతో జిల్లాలోని వివిధ శాఖల అధికారులు కూడా అప్రమత్తంగా ఉండాలని మంత్రి కింజరాపు అచ్చెన్నాయుడు సూచించారు. ఇరిగేషన్, రెవెన్యూ, విద్యుత్ శాఖ అధికారులు పరిస్థితులను నిరంతరం పర్యవేక్షించాలని ఆదేశించారు. కలెక్టర్, ఎస్పీతో మాట్లాడి ఎప్పటికప్పుడు పరిస్థితులపై సమాచారం తెలుసుకుంటున్నట్లు తెలిపారు. తీరప్రాంత గ్రామాల ప్రజలను అప్రమత్తం చేయాలని మంత్రి అధికారులకు సూచించారు. నదీ పరివాహక ప్రాంతాల్లో నివసించే ప్రజలు జాగ్రత్తగా ఉండాలని తెలిపారు. వర్షాల కారణంగా ఎలాంటి అత్యవసర పరిస్థితులు వచ్చినా ఎదుర్కొనేందుకు అధికారులు సిద్ధంగా ఉండాలని ఆదేశించారు. భారీ వర్షాల సమయంలో ప్రజలు జాగ్రత్తలు పాటించాలని అధికారులు సూచిస్తున్నారు. చెట్ల కింద, శిథిలావస్థలో ఉన్న భవనాలు, హోర్డింగ్స్ వద్ద ఉండకూడదని హెచ్చరించారు. లోతట్టు ప్రాంతాల్లో నివసించే ప్రజలను అవసరమైతే సురక్షిత ప్రాంతాలకు తరలించాలని సూచనలు జారీ చేశారు. ప్రాణ, ఆస్తి నష్టం జరగకుండా ముందస్తు చర్యలు తీసుకోవాలని అధికారులకు దిశానిర్దేశం చేశారు. అన్ని శాఖల అధికారులు సమన్వయంతో పనిచేసి ప్రజలకు ఎలాంటి ఇబ్బందులు తలెత్తకుండా చూడాలని ఆదేశించారు. అత్యవసర పరిస్థితుల కోసం కలెక్టరేట్‌లో కంట్రోల్ రూమ్ ఏర్పాటు చేసినట్లు తెలిపారు. తుపాన్ సమయంలో ప్రజలు అధికారుల సూచనలు పాటించాలని, అవసరమైన జాగ్రత్తలు తీసుకోవాలని అధికారులు కోరుతున్నారు. విద్యాసంస్థలకు సెలవుల ప్రకటనతో విద్యార్థులు, తల్లిదండ్రులకు కొంత ఉపశమనం లభించింది. వాతావరణ పరిస్థితులు సాధారణ స్థితికి వచ్చిన తర్వాత పాఠశాలల పునఃప్రారంభంపై నిర్ణయం తీసుకోనున్నారు. ప్రస్తుతం శ్రీకాకుళం జిల్లా యంత్రాంగం వర్షాలు, తుపాన్ ప్రభావాన్ని నిరంతరం పర్యవేక్షిస్తోంది. ప్రజల భద్రతే ప్రధాన లక్ష్యంగా అన్ని శాఖలు సమన్వయంతో పనిచేస్తున్నాయి