రేణిగుంట రైల్వే స్టేషన్‌లో పనులు.. నవంబరు 10 నుంచి పలు రైళ్ల రద్దు, దారి మళ్లింపు

తిరుపతి జిల్లాలోని రేణిగుంట రైల్వే స్టేషన్‌ యార్డ్‌ ఆధునీకరణ పనుల కారణంగా రైళ్ల రాకపోకల్లో మార్పులు చోటుచేసుకోనున్నాయి. రైల్వే మార్గాల అనుసంధానం, యార్డ్‌ అభివృద్ధి పనుల నేపథ్యంలో నవంబరు 10 నుంచి డిసెంబరు 27 వరకు పలు రైళ్లను రద్దు చేయడంతో పాటు మరికొన్ని రైళ్లను దారి మళ్లించనున్నట్లు దక్షిణ కోస్తా రైల్వే అధికారులు వెల్లడించారు. రేణిగుంట రైల్వే స్టేషన్‌ దక్షిణ భారతదేశంలోని ముఖ్యమైన రైల్వే జంక్షన్లలో ఒకటి. తిరుపతి, చెన్నై, బెంగళూరు, ముంబై, ఢిల్లీ వంటి ప్రధాన నగరాలకు వెళ్లే అనేక రైళ్లు ఈ మార్గం మీదుగా ప్రయాణిస్తాయి. దీంతో యార్డ్‌ ఆధునీకరణ పనుల ప్రభావం పలు మార్గాలపై పడనుంది. రైల్వే అధికారులు తెలిపిన వివరాల ప్రకారం, రేణిగుంట–నిశ్చింతపూర్‌ మధ్య వస్తు రవాణా చేసే నాలుగు రైళ్లను రద్దు చేశారు. అలాగే రోజువారీగా నడిచే కొన్ని ప్యాసింజర్‌ రైళ్లను కూడా తాత్కాలికంగా నిలిపివేయనున్నారు. కడప–అరక్కోణం, తిరుచానూరు–అరక్కోణం, చెన్నై–తిరుచానూరు, గూడూరు–రేణిగుంట, నెల్లూరు–రేణిగుంట మధ్య నడిచే ప్యాసింజర్‌ రైళ్లను 48 రోజుల పాటు రద్దు చేస్తున్నట్లు అధికారులు ప్రకటించారు. అదేవిధంగా చెన్నై–తిరుపతి మధ్య ప్రతిరోజూ నడిచే సప్తగిరి ఎక్స్‌ప్రెస్‌పై కూడా ప్రభావం పడనుంది. ఈ రైలును 27 రోజుల పాటు రద్దు చేయనున్నట్లు అధికారులు తెలిపారు. తిరుపతి, తిరుచానూరు, రేణిగుంట ప్రాంతాల నుంచి బయలుదేరే మరికొన్ని ఎక్స్‌ప్రెస్‌ రైళ్లను కూడా నిర్ణీత రోజుల పాటు నిలిపివేయనున్నారు. తిరుపతి–విశాఖపట్నం మధ్య వారంలో మూడు రోజులు నడిచే డబుల్‌ డెక్కర్‌ ఎక్స్‌ప్రెస్‌ రైలును డిసెంబరు 9 నుంచి 26 వరకు కొన్ని రోజుల్లో రద్దు చేయనున్నట్లు సమాచారం. అలాగే తిరుచానూరు నుంచి నాందేడ్‌, జాల్నా, కాచిగూడ, చర్లపల్లి ప్రాంతాలకు వెళ్లే వారాంతపు ఎక్స్‌ప్రెస్‌ రైళ్లలో కూడా మార్పులు చేశారు. రేణిగుంట–మైసూరు మధ్య నడిచే ఎక్స్‌ప్రెస్‌ రైలును డిసెంబరు 11, 12, 18, 19, 25, 26 తేదీల్లో రద్దు చేయనున్నారు. తిరుపతి–భువనేశ్వర్‌ ఎక్స్‌ప్రెస్‌ రైలును డిసెంబరు 12, 13, 14, 19, 20, 21, 26, 27 తేదీల్లో నిలిపివేయనున్నట్లు అధికారులు తెలిపారు. 73 ఎక్స్‌ప్రెస్‌ రైళ్ల దారి మళ్లింపు రేణిగుంట మీదుగా ప్రయాణించే మొత్తం 73 ఎక్స్‌ప్రెస్‌ రైళ్ల మార్గాల్లో మార్పులు చేయనున్నారు. ముంబై, హౌరా, ఢిల్లీ, కన్యాకుమారి, చెన్నై, త్రివేండ్రం, బెంగళూరు, మైసూరు ప్రాంతాలకు వెళ్లే రైళ్లను ప్రత్యామ్నాయ మార్గాల్లో నడపనున్నారు. కొన్ని రైళ్లు గుత్తి, ధర్మవరం మార్గం మీదుగా నడవగా, మరికొన్ని రైళ్లు గూడూరు, పెరంబూరు మార్గాల్లో ప్రయాణించేలా ప్రణాళిక రూపొందించారు. రేణిగుంట నుంచి నిజాముద్దీన్‌ వరకు వెళ్లే దూద్‌ దొరొంతో పాల రవాణా చేసే ప్రత్యేక రైలును కూడా మార్గం మార్చారు. ఈ రైలు రేణిగుంట నుంచి ఎర్రగుంట్ల, నంద్యాల, గుంటూరు, విజయవాడ మార్గం మీదుగా నడవనున్నట్లు అధికారులు తెలిపారు. ప్రయాణికులు తమ ప్రయాణాలను ప్రణాళిక చేసుకునే ముందు రైల్వే అధికారిక సమాచారం పరిశీలించాలని అధికారులు సూచించారు. రద్దు చేసిన రైళ్లు, మారిన మార్గాలు, ప్రయాణ సమయాలపై ముందుగానే తెలుసుకోవడం ద్వారా ఇబ్బందులను తగ్గించుకోవచ్చని తెలిపారు. రేణిగుంట యార్డ్‌ ఆధునీకరణ పూర్తయిన తర్వాత రైళ్ల రాకపోకలు మరింత సులభతరం అవుతాయని, భవిష్యత్తులో మెరుగైన రైల్వే సేవలు అందించేందుకు ఈ పనులు చేపడుతున్నట్లు అధికారులు పేర్కొన్నారు.