ధర్మస్థలతో తనకు సంబంధం లేదన్న నటుడు

ధర్మస్థలలో అనుమానాస్పద మృతదేహాల ఖననం వివాదం, రూ.200 కోట్ల డీల్ ఆరోపణల నేపథ్యంలో నటుడు ప్రకాష్ రాజ్ తనపై వస్తున్న ఆరోపణలను ఖండించారు. బెంగళూరు ప్రెస్‌క్లబ్‌లో జరిగిన మీడియా సమావేశంలో ఆయన ఈ అంశాలపై స్పందించారు. మాజీ పారిశుద్ధ్య కార్మికుడు చిన్నయ్య చేసిన వ్యాఖ్యలను పూర్తిగా తిరస్కరించిన ప్రకాష్ రాజ్, ధర్మస్థలతో తనకు ఎలాంటి సంబంధం లేదన్నారు. ధర్మస్థల ప్రతిష్ఠను దెబ్బతీయడానికి భారీ మొత్తంలో డబ్బు ఖర్చు చేశారనే ఆరోపణలు వాస్తవాలకు విరుద్ధమని చెప్పారు. తన జీవితంలో ఇప్పటివరకు ధర్మస్థలకు వెళ్లలేదని, ఆలయ నిర్వాహకులను కూడా ఎప్పుడూ కలవలేదని స్పష్టం చేశారు. చిన్నయ్యతో జరిగిన ఫోన్ సంభాషణ గురించి వివరిస్తూ, మాజీ పోలీస్ అధికారి గిరీశ్ మట్టణ్ణనవర్ ద్వారా అతను తనతో మాట్లాడాడన్నారు. అతని మాటల్లో అనుమానం కలగడంతో వెంటనే సిట్ అధిపతి ప్రణబ్ మొహంతీకి సమాచారం అందించానని వెల్లడించారు. దర్యాప్తు పారదర్శకంగా సాగాలని తాను ఎప్పటి నుంచో కోరుతున్నానన్నారు. మీడియా సమావేశంలో చేసిన ‘పెయిడ్ మీడియా’ వ్యాఖ్యలు కొంత వివాదానికి దారితీశాయి. దీనిపై జర్నలిస్టులు అభ్యంతరం వ్యక్తం చేయడంతో, తన వ్యాఖ్యలు అందరినీ ఉద్దేశించి కావని ప్రకాష్ రాజ్ స్పష్టీకరించారు. కొందరు మీడియా సంస్థలు కోర్టుల కంటే ముందే తీర్పులు ఇచ్చే విధంగా వ్యవహరిస్తున్నాయని విమర్శించారు. సౌజన్య హత్యాచారం కేసులో నిజమైన నిందితులు శిక్షించబడాలని, బాధిత కుటుంబానికి న్యాయం జరగాలని మాత్రమే తాను కోరుకుంటున్నానని చెప్పారు. ధర్మస్థల ప్రతిష్ఠను దెబ్బతీయాలనే ఉద్దేశం తనకు లేదని, తప్పుడు ప్రచారాలను నమ్మవద్దని ప్రజలకు విజ్ఞప్తి చేశారు.