పింగళి వెంకయ్య 150వ జయంతి సందర్భంగా చంద్రబాబు, పవన్‌ నివాళులు

పింగళి వెంకయ్య 150వ జయంతి సందర్భంగా ఆంధ్రప్రదేశ్‌ ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్‌ కల్యాణ్‌ ఆయన సేవలను స్మరించుకున్నారు. జాతీయ పతాక రూపకల్పన ద్వారా దేశ ప్రజల్లో దేశభక్తిని పెంపొందించిన మహనీయుడిగా చంద్రబాబు కొనియాడారు. దేశభక్తుడిగా, జాతీయ పతాక రూపకర్తగా పింగళి భారతజాతికి చిరస్మరణీయమైన సేవలు అందించారని పేర్కొన్నారు. మహాత్మా గాంధీ అభిమానాన్ని సంపాదించుకున్న ఆయన జీవితం దేశభక్తికి ఆదర్శమని తెలిపారు. భారత ఐక్యత, స్వేచ్ఛ, జాతీయ గర్వానికి శాశ్వత చిహ్నమైన త్రివర్ణ పతాకాన్ని పింగళి వెంకయ్య దేశానికి అందించారని పవన్‌ కల్యాణ్‌ పేర్కొన్నారు. ఆంధ్రప్రదేశ్‌లోని కృష్ణా జిల్లా భట్లపెనుమర్రులో ఆయన జన్మించడం ప్రతి తెలుగు వ్యక్తికీ అపారమైన గర్వకారణమని తెలిపారు. పింగళి అసాధారణ వారసత్వం జాతీయ పతాక గౌరవాన్ని, స్ఫూర్తిని నిలబెట్టేందుకు భవిష్యత్‌ తరాలకు మార్గదర్శకంగా నిలుస్తుందని పవన్‌ పేర్కొన్నారు. పింగళి వెంకయ్య 1876 ఆగస్టు 2న జన్మించారు. స్వాతంత్ర్య ఉద్యమంలో పాల్గొన్న ఆయన భారతదేశానికి ప్రత్యేకమైన జాతీయ పతాకం అవసరమని భావించి పలు నమూనాలను అధ్యయనం చేశారు. 1921లో విజయవాడలో జరిగిన కాంగ్రెస్‌ సమావేశంలో ఆయన మహాత్మా గాంధీకి ఒక పతాక నమూనాను సమర్పించారు. వివిధ వర్గాల మధ్య ఐక్యతను సూచించే రంగులతో రూపొందిన ఆ పతాకం మధ్యలో స్వావలంబనకు గుర్తుగా చరఖా ఉండేది. పింగళి సమర్పించిన నమూనాలో 1931లో మార్పులు జరిగాయి. కాషాయం, తెలుపు, ఆకుపచ్చ రంగులతో కూడిన పతాకాన్ని కాంగ్రెస్‌ అధికారికంగా స్వీకరించింది. స్వాతంత్ర్యం ముందు రాజ్యాంగ సభ 1947 జూలై 22న ప్రస్తుత జాతీయ పతాకాన్ని ఆమోదించింది. ఆ సమయంలో మధ్యలోని చరఖా స్థానంలో అశోక ధర్మచక్రాన్ని చేర్చారు. అందువల్ల ప్రస్తుతం ఉన్న త్రివర్ణ పతాకం పింగళి నమూనా ఆధారంగా పరిణామం చెందినదిగా చారిత్రక వనరులు పేర్కొంటున్నాయి.