విదేశీ భక్తులకు తిరుపతి నుంచే ఈ వీసా అవకాశం

తిరుమల శ్రీవేంకటేశ్వర స్వామి దర్శనం కోసం వచ్చే విదేశీ భక్తులకు ఆంధ్రప్రదేశ్ ప్రభుత్వం కీలక సౌకర్యాన్ని అందుబాటులోకి తీసుకురానుంది. తిరుపతి సమీపంలోని రేణిగుంట విమానాశ్రయంలో ఈ వీసా సేవలు ప్రారంభించాలని ప్రభుత్వం నిర్ణయం తీసుకుంది. ప్రస్తుతం విదేశాల నుంచి తిరుమల దర్శనం కోసం వచ్చే భక్తులు ముందుగా చెన్నై, బెంగళూరు లేదా హైదరాబాద్ వంటి నగరాలకు చేరుకుని అక్కడ ఈ వీసా ప్రక్రియ పూర్తి చేసుకోవాల్సి వస్తోంది. అనంతరం రోడ్డు లేదా ఇతర మార్గాల ద్వారా తిరుపతికి చేరుకుంటున్నారు. తాజా నిర్ణయంతో విదేశీ ప్రయాణికులు నేరుగా తిరుపతి విమానాశ్రయానికి చేరుకుని ఈ వీసా ప్రక్రియను పూర్తి చేసుకునే అవకాశం కలగనుంది. ప్రయాణికులు తమ ప్రయాణానికి కనీసం పది రోజుల ముందే ఆన్‌లైన్ ద్వారా ఈ వీసా పొందాల్సి ఉంటుంది. రేణిగుంట విమానాశ్రయంలో అంతర్జాతీయ విమాన సేవలు ప్రస్తుతం పూర్తిస్థాయిలో అందుబాటులో లేకపోయినప్పటికీ, భవిష్యత్ అవసరాలను దృష్టిలో ఉంచుకుని ఈ వీసా కౌంటర్‌కు అనుమతి లభించినట్లు సమాచారం. తిరుపతి విమానాశ్రయం నుంచి అంతర్జాతీయ సర్వీసులు ప్రారంభించే అవకాశాలపై కూడా ప్రభుత్వం దృష్టి సారిస్తోంది. తిరుమల శ్రీవారి దర్శనం కోసం ప్రతి సంవత్సరం ప్రపంచవ్యాప్తంగా ఉన్న భక్తులు పెద్ద సంఖ్యలో తిరుపతికి వస్తుంటారు. విదేశీ భక్తుల ప్రయాణ ప్రక్రియను సులభతరం చేయడంతో పాటు తిరుపతి ప్రాంతంలో అంతర్జాతీయ ప్రయాణ సౌకర్యాల అభివృద్ధికి ఈ నిర్ణయం తోడ్పడనుంది.