భారత్‌కు భద్రతా మండలిలో శాశ్వత సభ్యత్వానికి మద్దతు.. నాలుగు యూరప్ దేశాల కీలక ప్రకటన

ఐక్యరాజ్యసమితి భద్రతా మండలిలో శాశ్వత సభ్యత్వం సాధించేందుకు భారత్ చేస్తున్న ప్రయత్నాలకు అంతర్జాతీయ స్థాయిలో మరింత మద్దతు లభిస్తోంది. తాజాగా మధ్య ఐరోపాకు చెందిన నాలుగు దేశాలు భారత్‌కు తమ మద్దతును ప్రకటించాయి. హంగేరీ, పోలాండ్, స్లోవేకియా, చెక్ రిపబ్లిక్ దేశాలతో కూడిన విసెగ్రాడ్ గ్రూప్ (V4) భారత్‌కు భద్రతా మండలిలో శాశ్వత సభ్యత్వం కల్పించాలన్న డిమాండ్‌కు మద్దతుగా నిలిచింది. న్యూయార్క్‌లో జరుగుతున్న 81వ ఐక్యరాజ్యసమితి సర్వసభ్య సమావేశం సందర్భంగా తొలి V4-భారత్ విదేశాంగ మంత్రుల సమావేశం జరిగింది. ఈ సమావేశంలో భారత్‌కు ఐక్యరాజ్యసమితి భద్రతా మండలిలో శాశ్వత సభ్యత్వం కల్పించే అంశంపై చర్చ జరిగింది. భారత విదేశాంగ మంత్రి ఎస్. జైశంకర్‌తో సమావేశం అనంతరం స్లోవేకియా విదేశాంగ మంత్రి జురాజ్ బ్లానార్ కీలక వ్యాఖ్యలు చేశారు. ప్రపంచ రాజకీయాల్లో భారత్ పాత్ర పెరుగుతున్న నేపథ్యంలో భద్రతా మండలిలో భారత్‌కు స్థానం కల్పించాల్సిన అవసరం ఉందని V4 దేశాలు అభిప్రాయపడినట్లు సమాచారం. ప్రపంచ దక్షిణ దేశాల్లో భాగమైన భారత్, ఇండో-పసిఫిక్ ప్రాంతంలో అభివృద్ధి చెందుతున్న కీలక దేశంగా స్లోవేకియా విదేశాంగ మంత్రి పేర్కొన్నారు. ఐక్యరాజ్యసమితి భద్రతా మండలిలో భారత్ శాశ్వత సభ్యదేశంగా ఉండాల్సిందేనని V4 దేశాలు ఏకాభిప్రాయంతో ఉన్నాయని ఆయన తెలిపారు. భద్రతా మండలిలో శాశ్వత సభ్యత్వం కోసం భారత్ చాలాకాలంగా ప్రయత్నిస్తోంది. ప్రస్తుత ప్రపంచ రాజకీయ, ఆర్థిక పరిస్థితులు మారినప్పటికీ, 1945లో ఏర్పడిన భద్రతా మండలి శాశ్వత సభ్యత్వ నిర్మాణంలో పెద్దగా మార్పులు రాలేదని భారత్ వాదిస్తోంది. మారుతున్న అంతర్జాతీయ పరిస్థితులకు అనుగుణంగా ఐక్యరాజ్యసమితి వ్యవస్థలో సంస్కరణలు అవసరమని భారత్ చెబుతోంది. ఐక్యరాజ్యసమితి భద్రతా మండలిలో ప్రస్తుతం అమెరికా, రష్యా, చైనా, బ్రిటన్, ఫ్రాన్స్ దేశాలు శాశ్వత సభ్యులుగా ఉన్నాయి. శాశ్వత సభ్యత్వంతో పాటు వీటికి వీటో అధికారం కూడా ఉంటుంది. ప్రపంచ జనాభాలో పెద్ద భాగానికి ప్రాతినిధ్యం వహిస్తున్న దేశాలకు కూడా మండలిలో తగిన స్థానం కల్పించాల్సిన అవసరం ఉందని భారత్ తన వాదనల్లో పేర్కొంటోంది. భారత్ శాశ్వత సభ్యత్వ ప్రతిపాదనకు గతంలోనే పలు దేశాలు మద్దతు ప్రకటించాయి. ఫ్రాన్స్, బ్రిటన్, అమెరికా, రష్యా సహా పలు దేశాలు భారత్‌కు మద్దతు తెలిపినట్లు సమాచారం. అలాగే జీ4 కూటమిలోని బ్రెజిల్, జర్మనీ, జపాన్ దేశాలు కూడా భద్రతా మండలి సంస్కరణలకు మద్దతు ఇస్తున్నాయి. అయితే చైనా నుంచి భారత్ ప్రతిపాదనకు స్పష్టమైన మద్దతు లభించలేదు. భద్రతా మండలి విస్తరణ, కొత్త శాశ్వత సభ్యుల ఎంపిక వంటి అంశాలు ఐక్యరాజ్యసమితిలో చాలాకాలంగా చర్చకు వస్తున్నాయి. ప్రపంచంలో కొత్త శక్తి సమీకరణాలు ఏర్పడుతున్న నేపథ్యంలో మండలి నిర్మాణంలో మార్పులు అవసరమనే అభిప్రాయాలు పలు దేశాల నుంచి వ్యక్తమవుతున్నాయి. భారత్‌కు V4 దేశాల మద్దతు లభించడం అంతర్జాతీయ వేదికపై కీలక పరిణామంగా భావిస్తున్నారు. ఈ మద్దతు ద్వారా భద్రతా మండలి సంస్కరణలపై చర్చలు మరింత ప్రాధాన్యం పొందే అవకాశం ఉంది. ఐక్యరాజ్యసమితిలో శాశ్వత సభ్యత్వం కోసం భారత్ చేస్తున్న దౌత్య ప్రయత్నాల్లో ఈ పరిణామం ఒక ముఖ్యమైన అంశంగా నిలిచింది.