హోర్ముజ్‌ను ఒక్క ట్వీట్‌తో స్వాధీనం చేసుకోలేరు.. ట్రంప్‌కు ఇరాన్ ఘాటు కౌంటర్

హోర్ముజ్ జలసంధిపై అమెరికా, ఇరాన్ మధ్య మరోసారి మాటల యుద్ధం తీవ్రమైంది. హోర్ముజ్ జలసంధిని అమెరికా భూభాగంగా ప్రకటిస్తానంటూ అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలపై ఇరాన్ ఘాటుగా స్పందించింది. ట్వీట్లు లేదా సైనిక శక్తితో వ్యూహాత్మకంగా అత్యంత కీలకమైన ఈ జలసంధిని స్వాధీనం చేసుకోవడం సాధ్యం కాదని స్పష్టం చేసింది. ఇరాన్ విదేశాంగ శాఖ సహాయ మంత్రి కాజెమ్ ఘరీబాబాది స్పందిస్తూ.. హోర్ముజ్ జలసంధి గతంలోనూ, ప్రస్తుతం, భవిష్యత్తులోనూ ఇరాన్ పరిధిలోనే ఉంటుందని పేర్కొన్నారు. నౌకాదళ నౌకలతో బెదిరించడం ద్వారా పరిస్థితిని మార్చలేరని వ్యాఖ్యానించారు. న్యూయార్క్‌లో జరిగిన ఓ కార్యక్రమంలో ట్రంప్ మాట్లాడుతూ, ఇరాన్‌ను ఓడించిన తర్వాత హోర్ముజ్ జలసంధిని అమెరికా భూభాగంగా ప్రకటిస్తానని వ్యాఖ్యానించినట్లు కథనాలు వెల్లడించాయి. ఈ జలసంధిపై అమెరికాకు పూర్తి నియంత్రణ ఉందని ఆయన సోషల్ మీడియాలో పేర్కొన్నట్లు వార్తలు వచ్చాయి. ట్రంప్ వ్యాఖ్యలు అంతర్జాతీయంగా చర్చకు దారితీయడంతో వైట్ హౌస్ నుంచి వివరణ వచ్చినట్లు అమెరికా మీడియా తెలిపింది. ట్రంప్ ఆ వ్యాఖ్యలను సరదాగా చేశారని ఓ ఉన్నతాధికారి పేర్కొన్నట్లు వాల్ స్ట్రీట్ జర్నల్ వెల్లడించింది. ప్రపంచ చమురు రవాణాలో హోర్ముజ్ జలసంధికి అత్యంత వ్యూహాత్మక ప్రాధాన్యం ఉండటంతో, దీనిపై అమెరికా–ఇరాన్ మధ్య వెలువడుతున్న వ్యాఖ్యలు అంతర్జాతీయంగా ఆసక్తి రేపుతున్నాయి.