తక్కువ స్పీడ్‌ బ్యాటరీ బైకులకు నో రూల్స్‌!

తక్కువ స్పీడ్‌తో నడిచే బ్యాటరీ బైకులకు మోటారు వాహన నిబంధనల నుంచి మినహాయింపు ఇవ్వాలని కేంద్ర ప్రభుత్వం భావిస్తోంది. ఇందుకోసం మోటారు వాహనాల చట్టం–1989లో మార్పులు చేయడానికి ముసాయిదా ప్రతిపాదనలను ఆగస్టు 28న విడుదల చేసింది. ప్రతిపాదిత మార్పులు 2026 అక్టోబర్‌ 1 నుంచి అమల్లోకి వచ్చే అవకాశం ఉంది. ప్రతిపాదన ప్రకారం 0.6 కిలోవాట్‌ కంటే తక్కువ సామర్థ్యం కలిగి, గంటకు 25 కిలోమీటర్ల కంటే తక్కువ వేగంతో నడిచే బ్యాటరీ బైకులకు మోటారు వాహన నిబంధనల నుంచి మినహాయింపు లభించే అవకాశం ఉంది. అయితే వాహనదారుల భద్రతపై కూడా దృష్టి పెట్టాలని మాజీ రోడ్డు భద్రతా శాస్త్రవేత్త వేలుమురుగన్‌ సూచించారు. కనీసం ఇలాంటి వాహనాలను నడిపేవారికి హెల్మెట్‌ వినియోగాన్ని తప్పనిసరి చేస్తే మంచిదని ఆయన అభిప్రాయపడ్డారు.