అమరావతికి సీడ్‌ యాక్సెస్‌ రోడ్డు తొలి అడుగు.. అభివృద్ధిని ఎవరూ ఆపలేరు: సీఎం చంద్రబాబు

అమరావతి రాజధాని నిర్మాణంలో మరో కీలక ఘట్టం ఆవిష్కృతమైంది. రాజధాని ప్రాంతాన్ని విజయవాడ, మంగళగిరి, గుంటూరుతో అనుసంధానించే ప్రధాన రహదారి సీడ్‌ యాక్సెస్‌ రోడ్డు ఈ-3ను ముఖ్యమంత్రి చంద్రబాబు నాయుడు ప్రారంభించారు. ఉండవల్లి వద్ద జరిగిన కార్యక్రమంలో సీఎం చంద్రబాబు మంత్రులు పి. నారాయణ, నాదెండ్ల మనోహర్‌లతో కలిసి శిలాఫలకాన్ని ఆవిష్కరించారు. సీడ్‌ యాక్సెస్‌ రోడ్డుతో పాటు బకింగ్‌హామ్‌ కాలువపై నిర్మించిన స్టీల్‌ బ్రిడ్జిలను కూడా ప్రారంభించారు. ఈ సందర్భంగా చంద్రబాబు మాట్లాడుతూ సీడ్‌ యాక్సెస్‌ రోడ్డు అమరావతి నిర్మాణంలో తొలి అడుగని అన్నారు. ఇది స్వర్ణాంధ్ర విజన్‌లో మొదటి విజయంగా అభివర్ణించారు. అమరావతిని ఆధునిక, కాలుష్య రహిత నగరంగా అభివృద్ధి చేస్తామని తెలిపారు. అమరావతిని డీప్‌టెక్‌ క్యాపిటల్‌, ఏఐ, క్వాంటం కంప్యూటింగ్‌ కేంద్రంగా తీర్చిదిద్దే లక్ష్యంతో ముందుకు వెళ్తున్నామని సీఎం పేర్కొన్నారు. బ్లూ, గ్రీన్‌, గ్రీన్‌ ఎనర్జీ, క్వాంటం, డీప్‌టెక్‌ వంటి ఐదు ప్రధాన కాన్సెప్టులతో రాజధాని నిర్మాణం జరుగుతుందని తెలిపారు. అమరావతికి 190 కిలోమీటర్ల ఔటర్‌ రింగ్‌ రోడ్డు, 96 కిలోమీటర్ల ఇన్నర్‌ రింగ్‌ రోడ్డు మంజూరు చేసిన కేంద్ర ప్రభుత్వానికి సీఎం ధన్యవాదాలు తెలిపారు. 2028 నాటికి దేశం గర్వించే రాజధానిగా అమరావతిని తీర్చిదిద్దుతామని చెప్పారు. 2047 నాటికి ఆంధ్రప్రదేశ్‌ను స్వర్ణాంధ్రగా మార్చాలనే సంకల్పంతో ప్రతి ఒక్కరూ భాగస్వాములు కావాలని చంద్రబాబు పిలుపునిచ్చారు. రాష్ట్రాభివృద్ధి, దేశాభివృద్ధి కోసం దీర్ఘకాలిక లక్ష్యాలతో ముందుకు సాగాలని సూచించారు. ఈ కార్యక్రమంలో మంత్రులు, ప్రజాప్రతినిధులు, అధికారులు, రాజధాని రైతులు పాల్గొన్నారు.