165 మంది ఎంపికైన వారిలో 160 మంది పత్రాల్లో మార్కుల మార్పులు

ఆంధ్రప్రదేశ్‌లో గత వైసీపీ ప్రభుత్వ హయాంలో జరిగిన గ్రూప్-1 జవాబు పత్రాల మూల్యాంకన వ్యవహారంపై ప్రత్యేక దర్యాప్తు బృందం హైకోర్టుకు తుది నివేదిక సమర్పించింది. మూల్యాంకన ప్రక్రియలో నిబంధనల ఉల్లంఘనలు జరిగినట్లు తమ దర్యాప్తులో గుర్తించినట్టు సిట్ నివేదికలో పేర్కొంది. ఒకే జవాబు పత్రాలను మూడుసార్లు మూల్యాంకనం చేసినట్లు తెలిపింది. సిట్ నివేదిక ప్రకారం జవాబు పత్రాల మూల్యాంకనం డిజిటల్ విధానంతో పాటు హైలాండ్, విజయవాడల్లో మూడు దశల్లో జరిగింది. ఎంపికైన 165 మంది అభ్యర్థుల్లో 160 మంది జవాబు పత్రాల్లో మార్కులకు సంబంధించిన మార్పులు గుర్తించినట్లు పేర్కొంది. ఎంపిక కాని 161 మందిలో 153 మంది పత్రాల్లోనూ మార్పులు ఉన్నట్లు తెలిపింది. రిట్ పిటిషనర్లకు సంబంధించిన 405 జవాబు పత్రాల్లో కూడా మార్పులు జరిగినట్లు నివేదికలో పేర్కొంది. చీఫ్ ఎగ్జామినర్లు మార్కులను సవరించినట్లు ఫోరెన్సిక్ పరిశీలనలో వెల్లడైందని సిట్ తెలిపింది. 61 స్లిప్పుల్లో వైట్ కరెక్షన్ ద్రవం వాడిన ఆనవాళ్లు గుర్తించినట్లు పేర్కొంది. హైలాండ్ రిసార్ట్‌లో జవాబు పత్రాలు 84 రోజుల పాటు ఉన్నట్లు కూడా నివేదికలో వివరించింది. మూల్యాంకనం కోసం అందుబాటులో ఉన్న 452 మంది నిపుణుల ప్యానల్‌ను పక్కనపెట్టి 66 మంది డేటా ఎంట్రీ ఆపరేటర్లను వినియోగించినట్లు సిట్ పేర్కొంది. మూడో మూల్యాంకనం కోసం కొత్త ఓఎంఆర్ బార్‌కోడ్ షీట్లను ముద్రించినట్లు తెలిపింది. ఒకే జవాబు పత్రాలను మూడుసార్లు మూల్యాంకనం చేయడం ఏపీపీఎస్సీ నిబంధనలకు విరుద్ధమని నివేదికలో అభిప్రాయపడింది. ఈ వ్యవహారంపై దర్యాప్తులో సిట్ దాదాపు 173 మంది సాక్షుల వాంగ్మూలాలను నమోదు చేసింది. ఏడు కేంద్ర ఫోరెన్సిక్ ప్రయోగశాలల నుంచి సేకరించిన సమాచారాన్ని కూడా పరిశీలించినట్లు పేర్కొంది. వాటితో పాటు మూల్యాంకనానికి సంబంధించిన రికార్డులు, మార్కుల మార్పులు, జవాబు పత్రాల నిర్వహణకు సంబంధించిన అంశాలను పరిశీలించి తుది నివేదిక రూపొందించినట్లు తెలిపింది. సిట్ పేర్కొన్న అంశాలు ప్రస్తుతం హైకోర్టు పరిశీలనలో ఉన్నాయి. నివేదికలోని నిర్ధారణలు, సమర్పించిన ఆధారాలపై న్యాయస్థానం తదుపరి విచారణలో నిర్ణయం తీసుకోవాల్సి ఉంది.