నెల్లూరులో రొట్టెల పండుగ ప్రారంభం.. స్వర్ణాల చెరువుకు భక్తుల వెల్లువ

నెల్లూరులోని ప్రసిద్ధ బారా షాహీద్‌ దర్గా రొట్టెల పండుగ ఘనంగా ప్రారంభమైంది. మత సామరస్యానికి ప్రతీకగా భావించే ఈ ఉత్సవం కోసం స్వర్ణాల చెరువు వద్ద వేలాది మంది భక్తులు ఉదయం నుంచే చేరుకున్నారు. రాష్ట్ర ప్రభుత్వం అధికారికంగా నిర్వహిస్తున్న ఈ ఉత్సవాలు జూన్‌ 26 నుంచి 30 వరకు కొనసాగనున్నాయి. కోర్కెలు నెరవేరాలనే విశ్వాసంతో భక్తులు రొట్టెలను పరస్పరం మార్పిడి చేసుకోవడం ఈ పండుగ ప్రత్యేకత. ఆరోగ్యం, ఉద్యోగం, విద్య, వివాహం, సంతానం, ఐశ్వర్యం వంటి కోరికలతో వచ్చే భక్తులు తమ విశ్వాసాన్ని వ్యక్తం చేస్తారు. కోరిక నెరవేరిన తర్వాత మళ్లీ వచ్చి రొట్టెలు సమర్పించడం సంప్రదాయంగా కొనసాగుతోంది. మంత్రి నారాయణ ఆదేశాల మేరకు జిల్లా కలెక్టర్‌ హిమాన్షు శుక్లా ఆధ్వర్యంలో అన్ని శాఖలు సమన్వయంతో ఏర్పాట్లు చేశాయి. ఎస్పీ అజిత వేజెండ్ల, జాయింట్‌ కలెక్టర్‌ మొగిలి వెంకటేశ్వర్లు, నగరపాలక సంస్థ కమిషనర్‌ నందన్‌ ఏర్పాట్లను నిరంతరం పర్యవేక్షిస్తున్నారు. భారీ రద్దీని దృష్టిలో ఉంచుకుని వైద్య శిబిరాలు, అంబులెన్స్‌లు సిద్ధంగా ఉంచారు. చెరువు వద్ద ప్రమాదాలు జరగకుండా 15 బోట్లు, ప్రతి షిఫ్ట్‌కు 15 మంది గజఈతగాళ్లను మత్స్యశాఖ ఏర్పాటు చేసింది. ట్రాఫిక్‌, పారిశుద్ధ్యం, తాగునీరు, భద్రతపై ప్రత్యేక చర్యలు చేపట్టారు. మత భేదాలకు అతీతంగా అన్ని వర్గాల ప్రజలు పాల్గొనే ఈ రొట్టెల పండుగ నెల్లూరుకు ప్రత్యేక గుర్తింపుగా నిలుస్తోంది. భక్తి, విశ్వాసం, సామరస్యానికి ప్రతీకగా ప్రతి ఏడాది లక్షలాది మంది ఈ ఉత్సవంలో పాల్గొంటున్నారు.