సెంటు సీసాలు పడేస్తున్నారా? ఇలా చేస్తే ఇంటికి రాయల్ లుక్!

ఖాళీ అయిన పెర్ఫ్యూమ్‌ సీసాలను చాలామంది సాధారణంగా చెత్తలో పడేస్తుంటారు. అయితే అందంగా కనిపించే గాజు, క్రిస్టల్‌ సీసాలను కొద్దిపాటి సృజనాత్మకతతో ఇంటి అలంకరణకు ఉపయోగించుకోవచ్చు. ముఖ్యంగా చక్కని డిజైన్‌తో ఉండే పెర్ఫ్యూమ్‌ బాటిల్స్‌ ఇంటికి ప్రత్యేకమైన రాయల్‌ లుక్‌ను తీసుకురాగలవు. చిన్నమూతితో పొడవుగా ఉండే పెర్ఫ్యూమ్‌ సీసాల్లో కొద్దిగా నీళ్లు పోసి రంగురంగుల పూల గుత్తి లేదా ఒకట్రెండు పూల కొమ్మలను ఉంచితే అందమైన వేజ్‌లా కనిపిస్తుంది. వీటిని కిటికీల దగ్గర, డ్రెస్సింగ్‌ మిర్రర్‌ పక్కన లేదా ఆఫీస్‌ టేబుల్‌పై ఉంచుకోవచ్చు. ఒకే రకమైన సీసాల కంటే వేర్వేరు డిజైన్లలో ఉన్న రెండు, మూడు బాటిల్స్‌ను కలిపి అలంకరిస్తే మరింత ఆకర్షణీయంగా కనిపిస్తాయి. లావుగా, పెద్దగా ఉండే సెంటు సీసాలను శుభ్రంగా కడిగి డిఫ్యూజర్‌ ఆయిల్‌ పోసి రీడ్‌ స్టిక్స్‌ పెట్టుకోవచ్చు. ఈ స్టిక్స్‌ నూనెను పీల్చుకుని సువాసనను చుట్టుపక్కల వ్యాపింపజేస్తాయి. బెడ్‌రూమ్‌లో లావెండర్‌, జాస్మిన్‌, రోజ్‌ వంటి సువాసనలను, హాల్లో ఆరెంజ్‌, లెమన్‌, లెమన్‌గ్రాస్‌, బెర్గామెట్‌ వంటి సువాసనలను ఉపయోగించవచ్చు. స్టడీ రూమ్‌లో యూకలిప్టస్‌, శాండల్‌, మింట్‌, సాంబ్రాణి వంటి సువాసనలను ఎంచుకోవచ్చు. సాదా గాజు సీసాల్లో బ్యాటరీతో పనిచేసే మినీ ఎల్‌ఈడీ లేదా కార్క్‌ ఫెయిరీ లైట్లను ఉంచి వెలిగిస్తే రాత్రిపూట అందమైన డెకరేషన్‌గా మారుతుంది. వీటిని హాల్‌, బెడ్‌రూమ్‌ వంటి ప్రదేశాల్లో ఏర్పాటు చేసుకోవచ్చు. అయితే చిన్న పిల్లలు ఉన్న ఇళ్లలో గాజు సీసాలు, చిన్న లైట్లు వారికి అందకుండా జాగ్రత్తగా ఉంచాలి. మూతి వెడల్పుగా ఉన్న పెర్ఫ్యూమ్‌ సీసాలను చిన్న వస్తువులను భద్రపరచడానికి కూడా ఉపయోగించవచ్చు. ఉంగరాలు, చెవి పోగులు, హెయిర్‌ క్లిప్స్‌, బాబీ పిన్స్‌, శారీ పిన్స్‌, యూ పిన్స్‌ వంటి వస్తువులను వీటిలో ఉంచి డ్రెస్సింగ్‌ టేబుల్‌పై పెట్టుకోవచ్చు. ఇలా ఖాళీ పెర్ఫ్యూమ్‌ సీసాలను పడేయకుండా మళ్లీ ఉపయోగించడం ద్వారా ఇంటి అలంకరణకు కొత్త అందాన్ని తీసుకురావడంతో పాటు వ్యర్థాలను తగ్గించవచ్చు.