గిరిజన యువత సమాజాభివృద్ధికి నాయకత్వం వహించాలి: రాష్ట్రపతి ముర్ము

ఆంధ్రప్రదేశ్‌లోని విశాఖపట్నంలో జరిగిన సెంట్రల్ ట్రైబల్ యూనివర్సిటీ తొలి కాన్వొకేషన్‌లో రాష్ట్రపతి ద్రౌపది ముర్ము పాల్గొని పట్టభద్రులకు పట్టాలు ప్రదానం చేశారు. ఈ సందర్భంగా ఆమె గిరిజన యువతను ఉద్దేశించి మాట్లాడుతూ, ప్రభుత్వ సహాయాన్ని మాత్రమే ఆశ్రయించడం కాకుండా సమాజ అభివృద్ధికి తాము కూడా బాధ్యత వహించాలని సూచించారు. గిరిజనులు, ఆదివాసీల అభ్యున్నతి కోసం కేంద్ర, రాష్ట్ర ప్రభుత్వాలు అనేక సంక్షేమ కార్యక్రమాలు అమలు చేస్తున్నాయని పేర్కొన్న ఆమె, ఆ కార్యక్రమాల ఫలితాలు గ్రామస్థాయికి చేరాలంటే విద్యావంతులైన యువత ముందుకు రావాల్సిన అవసరం ఉందన్నారు. సమాజాన్ని మార్చే శక్తి యువత చేతుల్లోనే ఉందని, విద్యతో పాటు సామాజిక బాధ్యతను కూడా అలవరచుకోవాలని సూచించారు. దేశం అభివృద్ధి చెందుతున్న వేళ ఆధునిక విజ్ఞానాన్ని ప్రతి వర్గానికి అందించడంతో పాటు గిరిజన సంప్రదాయాలు, సంస్కృతిని కూడా పరిరక్షించాల్సిన బాధ్యత అందరిదని రాష్ట్రపతి పేర్కొన్నారు. ఉత్తరాంధ్ర గిరిజన ప్రాంతాల్లో సైన్స్ అండ్ టెక్నాలజీ హబ్ ద్వారా విజ్ఞానాన్ని గ్రామీణ ప్రాంతాలకు తీసుకెళ్తున్న విశ్వవిద్యాలయాన్ని ఆమె అభినందించారు. గిరిజన సంక్షేమం, ప్రజారోగ్యం, వాతావరణ మార్పులు, ఆహార భద్రత, పోషకాహారం, శక్తి సంరక్షణ వంటి కీలక రంగాల్లో విశ్వవిద్యాలయం చేస్తున్న పరిశోధనలు దేశ భవిష్యత్తుకు ఉపయోగపడతాయని చెప్పారు. ఈ పరిశోధనల ఫలితాలు గ్రామీణ, గిరిజన ప్రాంతాల జీవన ప్రమాణాలను మెరుగుపరచడంలో కీలక పాత్ర పోషిస్తాయని అభిప్రాయపడ్డారు. 2047 నాటికి వికసిత్ భారత్ నిర్మాణమే దేశ లక్ష్యమని గుర్తు చేసిన రాష్ట్రపతి, సమాన అభివృద్ధి సాధించాలంటే గిరిజన యువత కూడా జాతీయ అభివృద్ధిలో భాగస్వాములు కావాలని పిలుపునిచ్చారు. విద్య పూర్తి చేసిన ప్రతి విద్యార్థి తన కుటుంబానికే కాకుండా సమాజానికి, దేశానికి సేవ చేయాలనే సంకల్పంతో ముందుకు సాగాలని సూచించారు. కార్యక్రమంలో కేంద్ర విద్యాశాఖ మంత్రి ధర్మేంద్ర ప్రధాన్, ఆంధ్రప్రదేశ్ విద్య, ఐటీ శాఖ మంత్రి నారా లోకేశ్ పాల్గొని విద్యార్థులను అభినందించారు. సమగ్ర, ఆచరణాత్మక విద్య ద్వారా గిరిజన ప్రాంతాల్లో సామాజిక మార్పు తీసుకురావడంలో ఈ విశ్వవిద్యాలయం కీలక కేంద్రంగా ఎదుగుతుందని వారు ఆశాభావం వ్యక్తం చేశారు. భవిష్యత్తులో గిరిజన యువత దేశ అభివృద్ధికి మార్గదర్శకులుగా నిలుస్తారని, విద్య ద్వారా సమాజంలో శాశ్వత మార్పు సాధ్యమవుతుందని ఈ సందర్భంగా పేర్కొన్నారు.