హౌసింగ్ సొసైటీ వసూళ్లపై దర్శకుడు సముద్ర స్పష్టీకరణ

ఏపీ సినీ వర్కర్స్ హౌసింగ్ సొసైటీ పేరుతో జరుగుతున్న వసూళ్లపై దర్శకుడు సముద్ర స్పందించారు. ఈ వ్యవహారంలో తన పేరు ప్రస్తావించడాన్ని ఖండిస్తూ ప్రజలకు అధికారిక వివరణ ఇచ్చారు. ఏపీ ప్రభుత్వం హౌసింగ్ సొసైటీకి ఎలాంటి భూమిని కేటాయించలేదని ఆయన స్పష్టం చేశారు. ప్రభుత్వం స్థలాలు ఇచ్చిందని, వాటి పేరుతో సభ్యుల నుంచి డబ్బులు సేకరిస్తున్నారని వస్తున్న ప్రచారం పూర్తిగా అవాస్తవమని పేర్కొన్నారు. కొంతమంది తనకు ఫోన్ చేసి ఈ విషయంపై వివరాలు అడగడంతో అందరికీ ఒకేసారి స్పష్టత ఇవ్వాలని నిర్ణయించుకున్నానన్నారు. తన పేరు లేదా హౌసింగ్ సొసైటీ పేరును ఉపయోగించి ఎవరైనా డబ్బులు వసూలు చేస్తే వారిపై చట్టపరమైన చర్యలు తీసుకుంటానని హెచ్చరించారు. ఏపీ ఫిల్మ్ డెవలప్‌మెంట్ కార్పొరేషన్ కొత్త కమిటీ సమర్థంగా పనిచేస్తోందని, రాష్ట్రంలో చిత్రసీమ అభివృద్ధి కోసం ప్రభుత్వం తీసుకుంటున్న చర్యలకు తాను పూర్తి సహకారం అందిస్తానని సముద్ర తెలిపారు. ఏపీ ఎఫ్‌డీసీ డైరెక్టర్‌గా సినీ పరిశ్రమ అభివృద్ధికి తన బాధ్యతలను సమర్థంగా నిర్వహిస్తానని స్పష్టం చేశారు.