టెక్నాలజీ సహకారంపై సింగపూర్ ప్రధానితో చంద్రబాబు చర్చలు

సింగపూర్ పర్యటనలో ఉన్న ఆంధ్రప్రదేశ్ ముఖ్యమంత్రి చంద్రబాబు నాయుడు, ఆ దేశ ప్రధాని లారెన్స్ వాంగ్‌తో భేటీ అయ్యారు. దాదాపు అరగంట పాటు జరిగిన ఈ సమావేశంలో రాష్ట్ర అభివృద్ధికి సంబంధించిన పలు అంశాలపై ఇరువురు నేతలు చర్చించినట్లు ప్రభుత్వ వర్గాలు తెలిపాయి. టెక్నాలజీ, సెమీ కండక్టర్లు, క్వాంటం, ఏఐ రంగాల్లో ఏపీకి సహకారం అందించాలని చంద్రబాబు కోరారు. వర్సిటీల్లో పరిశోధనలకు మద్దతు, నూతన సాంకేతిక రంగాల్లో నైపుణ్యాభివృద్ధి, కెపాసిటీ బిల్డింగ్ అంశాలను సమావేశంలో ప్రస్తావించారు. సెమీ కండక్టర్ల తయారీ ఎకో సిస్టమ్‌ను బలోపేతం చేసేందుకు సింగపూర్ అనుభవం ఉపయోగపడుతుందని ఆయన వివరించినట్లు సమాచారం. పట్టణ పాలన అంశంపైనా చంద్రబాబు చర్చించారు. ఏపీలోని నగరాలు, పట్టణాలకు సంబంధించి అర్బన్ గవర్నెన్స్‌లో సింగపూర్ సహకారం కావాలని కోరారు. పట్టణ ప్రణాళిక, మౌలిక సదుపాయాలు, ఆధునిక నగర నిర్వహణ వంటి అంశాల్లో సింగపూర్‌కు ఉన్న అనుభవాన్ని రాష్ట్ర అభివృద్ధికి అనుసంధానించాలనే అభిప్రాయం వ్యక్తమైంది. వ్యవసాయ, ఆక్వా రంగాలపైనా చర్చలు జరిగాయి. ఏపీలో ప్రకృతి సేద్యం ద్వారా పంటలు పండిస్తున్నట్లు చంద్రబాబు వివరించారు. రాష్ట్రం నుంచి ఉద్యాన, ఆక్వా ఉత్పత్తులు దిగుమతి చేసుకునే అంశాన్ని పరిశీలించాలని సింగపూర్ ప్రధానిని కోరారు. ప్రకృతి సేద్య పంటల సర్టిఫికేషన్, ట్రేసబిలిటీ సాధనకు చర్యలు తీసుకుంటున్నామని తెలిపారు. పోర్టులు, ఎయిర్‌పోర్టుల అభివృద్ధిలో ఏపీ, సింగపూర్ కలిసి పనిచేయాలని చంద్రబాబు ఆకాంక్షించారు. పెట్టుబడుల ఆకర్షణ, మౌలిక వసతుల బలోపేతం, అంతర్జాతీయ భాగస్వామ్యాల విస్తరణ ఈ పర్యటనలో ముఖ్య అంశాలుగా ఉన్నాయి. అమరావతి నిర్మాణాల పురోగతిపై సింగపూర్ ప్రధాని ఆరా తీసినట్లు ప్రభుత్వ వర్గాలు తెలిపాయి. తాజా భేటీతో ఏపీ-సింగపూర్ సహకారం టెక్నాలజీ, వ్యవసాయం, పట్టణాభివృద్ధి, మౌలిక వసతుల రంగాలకు విస్తరించే అవకాశాలు చర్చకు వచ్చాయి.