చమురు ధరలు తగ్గడంతో లాభాలతో ముగిసిన దేశీయ మార్కెట్లు

పశ్చిమాసియాలో ఉద్రిక్తతలు చల్లబడడంతో దేశీయ స్టాక్ మార్కెట్లు సోమవారం లాభాలతో ముగిశాయి. ఇరాన్-అమెరికా మధ్య శాంతి ఒప్పందం కుదరడంతో అంతర్జాతీయంగా చమురు ధరలు తగ్గాయి. ఈ పరిణామం భారత మార్కెట్లకు సానుకూలంగా మారింది. బ్రెంట్ క్రూడాయిల్ ధర 4.55 శాతం తగ్గి బ్యారెల్‌కు 83.36 డాలర్లకు చేరింది. ముడి చమురు దిగుమతులపై ఎక్కువగా ఆధారపడే భారత్‌కు చమురు ధరల తగ్గుదల కీలక అంశం. దీనితో పాటు డాలర్‌తో పోలిస్తే రూపాయి మారకం విలువ 94.74 వద్ద బలపడడం మార్కెట్ సెంటిమెంట్‌ను మెరుగుపరిచింది. గత సెషన్ ముగింపు స్థాయి 75,527తో పోలిస్తే సోమవారం ఉదయం సెన్సెక్స్ వెయ్యి పాయింట్లకుపైగా లాభంతో ప్రారంభమైంది. ప్రారంభంలో అదే జోష్ కొనసాగినా, మధ్యాహ్నం తర్వాత గరిష్ఠాల వద్ద మదుపర్లు లాభాల స్వీకరణకు దిగారు. దీంతో సూచీ కొంత దిగివచ్చింది. అయినప్పటికీ సెన్సెక్స్ చివరకు 736 పాయింట్ల లాభంతో 76,264 వద్ద రోజును ముగించింది. నిఫ్టీ కూడా సెన్సెక్స్ ధోరణినే అనుసరించింది. ప్రారంభ లాభాలను కొంత కోల్పోయినా, చివరకు 231 పాయింట్లు పెరిగి 23,853 వద్ద స్థిరపడింది. బ్యాంక్ నిఫ్టీ 384 పాయింట్లు లాభపడగా, నిఫ్టీ మిడ్ క్యాప్ సూచీ 781 పాయింట్లు ఆర్జించింది. విస్తృత మార్కెట్ సూచీల్లోనూ కొనుగోళ్ల ఆసక్తి కనిపించింది. సెన్సెక్స్, నిఫ్టీ పరిధిలో కల్యాణ్ జువెల్లర్స్, హెచ్‌డీఎఫ్‌సీ ఏఎంసీ, యూనో మిండా, ఎల్ అండ్ టీ ఫైనాన్స్, ప్రెస్టిజ్ ఎస్టేట్ వంటి షేర్లు లాభాలు ఆర్జించాయి. మరోవైపు అరబిందో ఫార్మా, వెర్నోవా టీడీ, ఎన్‌ఎమ్‌డీసీ, గాడ్‌ఫ్రే ఫిలిప్స్, వేదాంతా వంటి షేర్లు నష్టాలు మూటగట్టుకున్నాయి. రోజు ప్రారంభంలో భారీగా ఎగిసిన మార్కెట్లు చివరికి కొంత లాభాలు కోల్పోయినా, ప్రధాన సూచీలు పాజిటివ్‌గా ముగిశాయి. చమురు ధరల తగ్గుదల, రూపాయి బలం, పశ్చిమాసియా ఉద్రిక్తతలు చల్లబడటం సోమవారం మార్కెట్ ముగింపులో ప్రధాన ప్రభావకారకాలు అయ్యాయి.