అమరావతిలో అవకాశాలు చూడాలని సింగపూర్ పారిశ్రామికవేత్తలకు చంద్రబాబు పిలుపు

సింగపూర్‌లో జరుగుతున్న వరల్డ్ సిటీస్ సమ్మిట్ వేదికగా ఏపీ సీఎం చంద్రబాబు అమరావతి అభివృద్ధి దిశను అంతర్జాతీయ వేదికపై వివరించారు. సింగపూర్ పారిశ్రామికవేత్తలు అమరావతిని ప్రత్యక్షంగా సందర్శించి, సరికొత్త ఆలోచనలతో పెట్టుబడి అవకాశాలను వినియోగించుకోవాలని ఆయన పిలుపునిచ్చారు. రాష్ట్ర రాజధానిని కేవలం పరిపాలనా కేంద్రంగా కాకుండా, ఆర్థిక వృద్ధి, జ్ఞానం, సాంకేతికత, స్థిరమైన జీవన విధానాల కేంద్రంగా తీర్చిదిద్దుతున్నామని చెప్పారు. వరల్డ్ సిటీస్ సమ్మిట్‌లోని లీడర్‌షిప్ ప్లీనరీ-2లో ‘కెన్ స్మార్ట్ సిటీస్ లవ్ హ్యూమన్స్’ అనే అంశంపై చంద్రబాబు ప్రసంగించారు. 25 ఏళ్ల క్రితం తాను ఐటీ ప్రాధాన్యత గురించి మాట్లాడినప్పుడు వచ్చిన ఫస్ట్ మూవర్ అడ్వాంటేజ్ వల్ల తెలుగువాళ్లు ప్రపంచవ్యాప్తంగా ముందుకు వచ్చారని గుర్తు చేశారు. ఇప్పుడు ఆర్టిఫిషియల్ ఇంటెలిజెన్స్ యుగం వచ్చిందని, దానిని ప్రజల జీవన ప్రమాణాల పెంపుకు ఉపయోగించాల్సిన అవసరం ఉందని పేర్కొన్నారు. అమరావతి నిర్మాణంలో ‘పీపుల్ ఫస్ట్’ విధానమే తమ ప్రధాన దృక్పథమని చంద్రబాబు తెలిపారు. ఈక్విటీ, నేచర్, ఆపర్చ్యునిటీ, లివబుల్ సిటీ అనే నాలుగు అంశాల ఆధారంగా రాజధానిని తీర్చిదిద్దుతున్నామని చెప్పారు. అంతర్జాతీయ మౌలిక వసతులు, సుస్థిర అభివృద్ధి, పెట్టుబడులకు అనుకూల వాతావరణం అమరావతిలో కల్పిస్తున్నామని వివరించారు. కృష్ణా నది తీరంలో అమరావతి అద్భుత నగరంగా రూపుదిద్దుకుంటోందని చంద్రబాబు పేర్కొన్నారు. ఇన్నర్ రింగ్ రోడ్, ఔటర్ రింగ్ రోడ్, ఐకానిక్ బ్రిడ్జిలు, 21 కిలోమీటర్ల వాటర్ ఫ్రంట్ నగర నిర్మాణం అమరావతి ప్రత్యేకతలని చెప్పారు. సైక్లింగ్, వాకింగ్ ట్రాక్‌లు, గ్రీన్ ఫీల్డ్ ఎయిర్‌పోర్ట్, అండర్ గ్రౌండ్ యుటిలిటీస్, గ్రీన్ ఎనర్జీ, నెట్ జీరో లక్ష్యాలతో నగర రూపకల్పన జరుగుతోందని తెలిపారు. స్పోర్ట్స్, ఫైనాన్షియల్, నాలెడ్జ్, జస్టిస్, టూరిజం, హెల్త్, మీడియా వంటి కాన్సెప్ట్‌లను అమరావతి అభివృద్ధిలో భాగం చేస్తున్నామని సీఎం వివరించారు. రాజధాని కోసం రైతులు ఒకే పిలుపుతో 35 వేల ఎకరాలు ఇచ్చారని, ఆ భూమిలో కొంత భాగాన్ని అభివృద్ధి చేసి రైతులకు తిరిగి ప్లాట్లుగా అందిస్తున్నామని చెప్పారు. ఈ విధానం రాజధాని నిర్మాణంలో ప్రజల భాగస్వామ్యానికి ఉదాహరణగా నిలుస్తుందని ఆయన వ్యాఖ్యానించారు. సైబరాబాద్ అభివృద్ధిని చంద్రబాబు అమరావతి సందర్భంలో ఉదాహరణగా ప్రస్తావించారు. ఒకప్పుడు ఎకరం రూ.2 లక్షలు ఉన్న ప్రాంతాలు అభివృద్ధి తర్వాత భారీ విలువను సంతరించుకున్నాయని, సరైన మౌలిక వసతులు, దూరదృష్టి ఉంటే సంపద సృష్టి సాధ్యమవుతుందని చెప్పారు. అమరావతి కూడా అలాంటి ఆర్థిక వృద్ధి కేంద్రంగా మారుతుందని ఆయన విశ్వాసం వ్యక్తం చేశారు. అమరావతిని నాలెడ్జ్ సిటీగా తీర్చిదిద్దేందుకు జాతీయ, అంతర్జాతీయ విద్యాసంస్థలను తీసుకువస్తున్నామని చంద్రబాబు తెలిపారు. క్వాంటమ్ కంప్యూటింగ్ హబ్, డిజిటల్ ఇన్ఫ్రాస్ట్రక్చర్ అమరావతి భవిష్యత్ ఆకర్షణలుగా ఉంటాయని చెప్పారు. ప్రపంచ స్థాయి మౌలిక వసతులు, ప్రజా కేంద్రిత ప్రణాళిక, సాంకేతిక ఆధారిత అభివృద్ధితో అమరావతిని అత్యుత్తమ నగరంగా నిర్మించడమే ప్రభుత్వ లక్ష్యమని చంద్రబాబు సింగపూర్ వేదికగా స్పష్టం చేశారు.