ఢిల్లీ హాస్టల్ భవనం కూలిన ఘటన.. త్రుటిలో తప్పిన వీధి వ్యాపారి ప్రాణాలు

న్యూఢిల్లీ, సెప్టెంబర్ 7: ఢిల్లీలో చోటుచేసుకున్న హాస్టల్ భవనం కూలిన ఘటనలో ఓ వీధి వ్యాపారి తృటిలో ప్రాణాపాయం నుంచి తప్పించుకున్నాడు. భవనం కూలడానికి కొన్ని క్షణాల ముందు ప్రమాదాన్ని గుర్తించి అప్రమత్తంగా అక్కడి నుంచి పరుగెత్తడంతో అతడు సురక్షితంగా బయటపడ్డాడు. ఈ ఘటనకు సంబంధించిన సీసీటీవీ దృశ్యాలు ప్రస్తుతం వైరల్‌గా మారాయి. సీసీటీవీ ఫుటేజీ ప్రకారం, ఓ వ్యక్తి భవనం పక్కనే వీధి వ్యాపారం నిర్వహిస్తున్నాడు. మధ్యాహ్నం సమయంలో అతడు భవనం వైపు చూడగా కూలిపోతున్న పరిస్థితిని గమనించాడు. వెంటనే అక్కడి నుంచి పరుగెత్తి దూరంగా వెళ్లిపోయాడు. అతడు అక్కడి నుంచి కదిలిన కొద్దిసేపటికే భవనం కుప్పకూలింది. పెద్ద ఎత్తున దుమ్మూధూళి వ్యాపించింది. ప్రమాదాన్ని ముందుగానే గుర్తించి స్పందించడంతో అతడి ప్రాణాలు నిలిచాయి. ఈ ఘటన స్థానికంగా కలకలం రేపగా, ప్రమాద సమయంలో అప్రమత్తత ఎంత ముఖ్యమో ఈ వీడియో మరోసారి చాటిచెప్పింది. భవనం కూలిపోవడానికి గల కారణాలు, నష్టం వివరాలు తదితర అంశాలపై అధికారులు పరిశీలన చేస్తున్నట్లు సమాచారం.