రెండు నెలలు వ్యాయామం చేస్తే.. ఖరీదైన బహుమతులు.. దక్షిణ కొరియా కంపెనీ ఆఫర్ వైరల్

ఇటీవలి కాలంలో ఉద్యోగుల ఆరోగ్యం, ఫిట్‌నెస్‌పై కంపెనీలు ప్రత్యేకంగా దృష్టి సారిస్తున్నాయి. జిమ్ సభ్యత్వాలు, ఆరోగ్య పరీక్షలు, ఫిట్‌నెస్ కార్యక్రమాలతో ఉద్యోగులను వ్యాయామం వైపు ప్రోత్సహిస్తున్నాయి. ఈ క్రమంలో దక్షిణ కొరియాలోని ఓ కంపెనీ ప్రకటించిన ప్రత్యేక ఆఫర్ సోషల్ మీడియాలో వైరల్‌గా మారింది. కంపెనీలో పనిచేసే ఉద్యోగులు వరుసగా రెండు నెలల పాటు క్రమం తప్పకుండా వ్యాయామం చేయాలి. ప్రతిరోజూ వ్యాయామం చేసిన ఫొటోలు లేదా వీడియోలను తమ టీమ్ లీడర్ లేదా మేనేజర్‌కు పంపాల్సి ఉంటుంది. ఈ ఫిట్‌నెస్ కార్యక్రమాన్ని రెండు నెలల పాటు విజయవంతంగా పూర్తి చేసిన ఉద్యోగులకు కంపెనీ తరఫున ఖరీదైన బహుమతులు అందించనున్నట్లు సమాచారం. గూచీ, చానెల్, ప్రాడా వంటి లగ్జరీ బ్రాండ్లకు చెందిన వస్తువులను బహుమతులుగా అందిస్తారని సియోల్‌లో పనిచేస్తున్న భారతీయ మహిళ మాన్సీ అరోరా వెల్లడించారు. ఆమె ఇన్‌స్టాగ్రామ్‌లో షేర్ చేసిన వీడియో ద్వారా ఈ విషయం వెలుగులోకి వచ్చింది. ఉద్యోగులు ఎంత బిజీగా ఉన్నప్పటికీ తమ ఆరోగ్యంపై కూడా శ్రద్ధ పెట్టాలనే ఉద్దేశంతో ఈ ప్రోత్సాహకాన్ని అందిస్తున్నట్లు మాన్సీ తెలిపారు. ఈ ఆఫర్ తనకు కూడా వ్యాయామం ప్రారంభించేందుకు ప్రేరణ కలిగించిందని ఆమె పేర్కొన్నారు. ఆమె షేర్ చేసిన వీడియో సోషల్ మీడియాలో వైరల్‌గా మారింది.