ప్రపంచ యోగా దినోత్సవంలో మోదీ సందేశం.. ఆరోగ్యమే లక్ష్యం

ప్రపంచవ్యాప్తంగా 12వ అంతర్జాతీయ యోగా దినోత్సవ వేడుకలు ఘనంగా ప్రారంభమయ్యాయి. ఈ ఏడాది "ఆరోగ్యకరమైన వృద్ధాప్యం కోసం యోగా" అనే ప్రధాన థీమ్‌తో కార్యక్రమాలను నిర్వహిస్తున్నారు. ఈ సందర్భంగా పశ్చిమ బెంగాల్ రాజధాని కోల్‌కతాలోని ప్రసిద్ధ రెడ్ రోడ్‌లో నిర్వహించిన భారీ యోగా కార్యక్రమంలో ప్రధానమంత్రి నరేంద్ర మోదీ పాల్గొన్నారు. కార్యక్రమానికి హాజరైన వేలాది మందితో కలిసి యోగా సాధన చేసిన ప్రధాని మోదీ దేశ ప్రజలకు యోగా దినోత్సవ శుభాకాంక్షలు తెలిపారు. యోగా అనేది ప్రపంచాన్ని ఏకం చేసే శక్తిగా మారిందని ఆయన పేర్కొన్నారు. యోగా కేవలం శారీరక వ్యాయామం మాత్రమే కాకుండా మానసిక ప్రశాంతత, ఆధ్యాత్మిక వికాసానికి కూడా దోహదపడుతుందని చెప్పారు. బెంగాల్ భూమికి యోగా సంప్రదాయంతో ఉన్న అనుబంధాన్ని ప్రధాని ప్రత్యేకంగా ప్రస్తావించారు. రామకృష్ణ పరమహంస, స్వామి వివేకానంద, లహరి మహాశయుల వంటి మహనీయులు యోగా సందేశాన్ని ప్రపంచానికి చాటిచెప్పారని గుర్తు చేశారు. అలాంటి పవిత్ర గడ్డపై సామూహిక యోగా చేయడం తనకు ప్రత్యేక ఆధ్యాత్మిక అనుభూతిని కలిగించిందన్నారు. వయస్సు పెరిగినా ఆరోగ్యం, శక్తి తగ్గిపోకుండా ఉండటానికి యోగా ఎంతో ఉపయోగపడుతుందని ప్రధాని చెప్పారు. 20 ఏళ్ల వయస్సుతో పోలిస్తే 40 ఏళ్లలో మరింత ఆరోగ్యంగా, 30 ఏళ్లతో పోలిస్తే 50 ఏళ్లలో మరింత శక్తివంతంగా ఉండటమే లక్ష్యంగా పెట్టుకోవాలని సూచించారు. శరీరాన్ని దృఢంగా తీర్చిదిద్దడంలో, ఒత్తిడి లేని ప్రశాంత జీవితం గడపడంలో యోగా కీలక పాత్ర పోషిస్తుందని పేర్కొన్నారు. ప్రతి ఒక్కరూ ప్రతిరోజూ యోగా సాధన చేయాలని, మన గురించి మనకు ఎంత ఎక్కువ అవగాహన ఉంటే అంత మెరుగైన జీవితం గడపగలమని ప్రధాని మోదీ తెలిపారు.