తమిళనాడులో గ్యాస్ లీక్ విషాదం.. ఇద్దరి మృతి, 46 మందికి అస్వస్థత

తమిళనాడులో ఆదివారం విషాదకర ఘటన చోటుచేసుకుంది. తిరువల్లూరు జిల్లాలోని పెరియపాలెం సమీపంలోని కన్నిగైపైర్ ప్రాంతంలో ఉన్న ‘సెయింట్ పీటర్స్ అండ్ పాల్ సీఫుడ్ ఎక్స్‌పోర్ట్స్’ ఫుడ్ ప్రాసెసింగ్ యూనిట్‌లో గ్యాస్ లీక్ కావడంతో ఇద్దరు కార్మికులు మృతి చెందారు. మరో 46 మంది తీవ్ర అస్వస్థతకు గురయ్యారు. సమాచారం అందుకున్న వెంటనే పోలీసులు, అగ్నిమాపక సిబ్బంది, రెస్క్యూ బృందాలు సంఘటనా స్థలానికి చేరుకుని సహాయక చర్యలు చేపట్టాయి. గ్యాస్ ప్రభావానికి గురైన కార్మికులను సమీప ఆస్పత్రులకు తరలించారు. బాధితుల్లో కొందరికి ఊపిరి తీసుకోవడంలో ఇబ్బందులు, వాంతులు, తీవ్ర అలసట వంటి లక్షణాలు కనిపించినట్లు అధికారులు తెలిపారు. అస్వస్థతకు గురైన 46 మందిలో ఏడుగురు పరిస్థితి విషమంగా ఉండటంతో వెంటిలేటర్‌పై చికిత్స అందిస్తున్నారు. బాధితుల్లో ఎక్కువ మంది ఉత్తర భారత రాష్ట్రాలకు చెందిన కార్మికులుగా అధికారులు గుర్తించారు. వైద్య బృందాలు వారి ఆరోగ్య పరిస్థితిని నిరంతరం పర్యవేక్షిస్తున్నాయి. ఘటనకు గల కారణాలపై అధికారులు దర్యాప్తు ప్రారంభించారు. గ్యాస్ లీక్ ఎలా జరిగింది? భద్రతా ప్రమాణాలు పాటించారా లేదా? అనే అంశాలను పరిశీలిస్తున్నారు. ఫ్యాక్టరీలోని సాంకేతిక వ్యవస్థలను కూడా తనిఖీ చేస్తున్నారు. ఈ ఘటనపై తమిళనాడు గవర్నర్ రాజేంద్ర అర్లేకర్ తీవ్ర విచారం వ్యక్తం చేశారు. మృతుల కుటుంబాలకు సానుభూతి తెలియజేస్తూ, గాయపడిన వారు త్వరగా కోలుకోవాలని ఆకాంక్షించారు. ప్రమాదానికి సంబంధించి పూర్తి వివరాలు ఇంకా తెలియాల్సి ఉంది. దర్యాప్తు నివేదిక అనంతరం ప్రమాదానికి అసలు కారణం వెలుగులోకి వచ్చే అవకాశం ఉంది.