అన్నాచెల్లెళ్ల అనుబంధానికి ‘రక్ష’.. రేపే రాఖీ పౌర్ణమి

అన్నాచెల్లెళ్ల మధ్య ఉన్న ఆత్మీయ అనుబంధం, ప్రేమ, ఆప్యాయతలకు ప్రతీకగా నిలిచే రక్షాబంధన్‌ పండుగకు సందడి మొదలైంది. శ్రావణమాసం పౌర్ణమి సందర్భంగా జరుపుకునే ఈ పండుగ కోసం సోదరీమణులు ఎంతో ఉత్సాహంగా సిద్ధమవుతున్నారు. పుట్టింటికి దూరంగా ఉన్న ఆడపడుచులు ముందుగానే స్వగ్రామాలకు చేరుకుంటుండగా, మరికొందరు పోస్టు, కొరియర్‌ ద్వారా తమ సోదరులకు రాఖీలు పంపించారు. రాఖీ పండుగ సందర్భంగా సోదరీమణులు తమ సోదరుల మణికట్టుకు రక్షాసూత్రం కట్టి, స్వీట్లు తినిపించి, హారతి ఇస్తారు. సోదరులు తమ సోదరీమణులకు జీవితాంతం అండగా ఉంటామని హామీ ఇస్తూ కానుకలు అందించడం ఈ వేడుకలో ప్రత్యేకతగా ఉంటుంది. అందుకే రక్షాబంధన్‌ అన్నాచెల్లెళ్ల ప్రేమకు గుర్తుగా నిలిచింది. పండుగ నేపథ్యంలో మార్కెట్లలో రాఖీలకు భారీగా డిమాండ్‌ కనిపిస్తోంది. రుద్రాక్ష, స్టోన్‌, వెండి, బంగారు రాఖీలతో పాటు కుందన్‌, జరీ, మెరుపులతో రూపొందించిన రాఖీలు అందుబాటులోకి వచ్చాయి. చిన్నారులను ఆకట్టుకునేందుకు కార్టూన్‌ క్యారెక్టర్లతో ప్రత్యేకంగా తయారు చేసిన రాఖీలు కూడా దుకాణాల్లో దర్శనమిస్తున్నాయి. ఈ ఏడాది పెద్ద సైజు రాఖీలు కూడా మార్కెట్లోకి రావడం విశేషం. రాఖీల ధరలు వాటి డిజైన్‌, నాణ్యతను బట్టి మారుతున్నాయి. సాధారణ రాఖీలు ఒక్క రూపాయి నుంచి అందుబాటులో ఉండగా, ప్రత్యేక డిజైన్లు, వెండి, బంగారు రాఖీలు రూ.1,000 వరకు ధర పలుకుతున్నాయి. తమ సోదరుల కోసం సోదరీమణులు తమకు నచ్చిన రాఖీలను ఎంపిక చేసుకుంటున్నారు. రక్షాబంధన్‌ పండుగకు సంబంధించి అనేక పురాణ కథలు, సంప్రదాయాలు ప్రచారంలో ఉన్నాయి. ‘రక్షాబంధన్‌’ అనే పదం ‘రక్ష’ మరియు ‘బంధన్‌’ అనే పదాల నుంచి ఏర్పడిందని చెబుతారు. సోదరుడు, సోదరి మధ్య ప్రేమ, పరస్పర రక్షణ, నమ్మకానికి రాఖీ ప్రతీకగా భావిస్తారు. మహబూబాబాద్‌ జిల్లాలో ఈ పండుగ సందర్భంగా ప్రత్యేక సందడి నెలకొంది. ఆడపడుచులు ఇప్పటికే పుట్టింటికి చేరుకుంటుండగా, ఇళ్లలో రాఖీ వేడుకలకు ఏర్పాట్లు చేస్తున్నారు. రాఖీలు, స్వీట్లు కొనుగోలు చేసి కుటుంబ సభ్యులతో కలిసి పండుగను ఘనంగా నిర్వహించేందుకు సిద్ధమవుతున్నారు. రక్షాబంధన్‌ కేవలం రాఖీ కట్టే పండుగ మాత్రమే కాకుండా కుటుంబ బంధాలను మరింత బలపరిచే ప్రత్యేక సందర్భంగా నిలుస్తోంది. దూరంగా ఉన్న సోదరులు, సోదరీమణులు కూడా ఈ పండుగ సందర్భంగా ఒకరినొకరు పలకరించుకుని తమ అనుబంధాన్ని గుర్తు చేసుకుంటారు