భారత్ సరిహద్దుల్లో చైనా భారీ డ్యామ్.. ‘వాటర్ బాంబ్’పై శాస్త్రవేత్తల హెచ్చరిక

టిబెట్‌లోని యార్లుంగ్ సాంగ్పో నదిపై చైనా నిర్మిస్తున్న మైడాగ్ డ్యామ్‌పై ఆందోళనలు వ్యక్తమవుతున్నాయి. భారత్‌లో ఈ నదిని బ్రహ్మపుత్రగా పిలుస్తారు. సుమారు 60,000 మెగావాట్ల విద్యుత్ ఉత్పత్తి సామర్థ్యంతో ఈ ప్రాజెక్టును చైనా చేపట్టినట్లు కథనం పేర్కొంది. డ్యామ్ నిర్మిస్తున్న టిబెట్ ప్రాంతంలో తరచూ భూకంపాలు సంభవిస్తుండటంతో దీని భద్రతపై కొందరు భూగర్భ శాస్త్రవేత్తలు ఆందోళన వ్యక్తం చేస్తున్నారు. భూకంపం సంభవించిన సమయంలో డ్యామ్‌కు నష్టం జరిగితే భారీగా నీరు దిగువ ప్రాంతాలకు చేరే ప్రమాదం ఉందని వారు హెచ్చరిస్తున్నారు. దీంతో భారత్‌లోని ఈశాన్య రాష్ట్రాలు, బంగ్లాదేశ్‌పై ప్రభావం పడే అవకాశం ఉందనే అభిప్రాయాలు వ్యక్తమవుతున్నాయి. మైడాగ్ డ్యామ్ నిర్మాణ ప్రాంతంలో టెక్టోనిక్ ఫ్రాక్చర్ ఉన్నట్లు చైనా భూగర్భ శాస్త్రవేత్తలు గుర్తించినట్లు కథనంలో పేర్కొన్నారు. మరోవైపు, డ్యామ్ పూర్తయిన తర్వాత బ్రహ్మపుత్ర నీటి ప్రవాహంపై చైనా నియంత్రణ పెరగవచ్చనే ఆందోళనలు భారత్‌లో ఉన్నాయి. నీటిని ఎక్కువ కాలం నిల్వ చేసి ఒక్కసారిగా విడుదల చేస్తే వరదల ముప్పు, నీటి విడుదలను తగ్గిస్తే దిగువ ప్రాంతాల్లో నీటి కొరత ఏర్పడే అవకాశం ఉందనే వాదనలు వినిపిస్తున్నాయి. ఈ ప్రాజెక్టు కోసం భారీగా వ్యయం చేస్తున్నట్లు కథనం తెలిపింది. ప్రపంచంలో అతిపెద్ద డ్యామ్‌గా పేర్కొనే త్రీ గోర్జెస్ డ్యామ్ కంటే మైడాగ్ ప్రాజెక్టు పరిమాణం ఎక్కువగా ఉంటుందని అందులో పేర్కొంది. 2033 నాటికి డ్యామ్ నిర్మాణాన్ని పూర్తి చేయాలని చైనా లక్ష్యంగా పెట్టుకున్నట్లు కథనం వెల్లడించింది.