నేపాల్‌లో ఆకస్మిక వరదలు.. అసలు కారణం ఇదేనా?

నేపాల్‌లో ఆకస్మికంగా సంభవించిన వరదలు తీవ్ర ఆందోళనకు దారితీశాయి. చైనా సరిహద్దుకు సమీపంలోని రసువా జిల్లాలో భోటే కోశీ నదికి ఒక్కసారిగా వరద పోటెత్తడంతో నది తీరంలోని పలు ప్రాంతాలు తీవ్రంగా ప్రభావితమయ్యాయి. ఈ ఘటనలో 105 మంది భారతీయులు గల్లంతైనట్లు కథనాలు పేర్కొన్నాయి. వరదల కారణంగా స్థానికంగా భారీ నష్టం సంభవించినట్లు సమాచారం. ఆకస్మిక వరదలకు పలు కారణాలు ఉండొచ్చని నిపుణులు చెబుతున్నారు. కొండ ప్రాంతాల్లో తక్కువ సమయంలో భారీ వర్షం కురిసినా, కొండచరియలు విరిగిపడి నదీ ప్రవాహానికి అడ్డంకులు ఏర్పడినా వరదలు ఒక్కసారిగా ఉద్ధృతంగా మారే అవకాశం ఉంటుంది. అంతేకాకుండా హిమాలయ ప్రాంతాల్లో గ్లేషియల్ సరస్సులు అస్థిరంగా మారడం కూడా మరో ప్రమాదకర పరిస్థితిగా నిపుణులు పేర్కొంటున్నారు. రసువా జిల్లాలో ఆ రోజు భారీ వర్షాలకు అవకాశం తక్కువగా ఉందని స్థానిక వాతావరణ శాఖ ముందుగా అంచనా వేసినట్లు కథనంలో ఉంది. అయితే నేపాల్‌కు ఎగువన ఉన్న టిబెట్ ప్రాంతంలో భారీ వర్షాలు కురిసినట్లు శాటిలైట్ చిత్రాల ఆధారంగా జాతీయ మీడియాలో కథనాలు వెలువడ్డాయి. ఈ పరిణామం కూడా భోటే కోశీ నదిలో ఆకస్మిక వరదకు కారణమై ఉండొచ్చనే చర్చ జరుగుతోంది. అయితే వరదకు ఖచ్చితమైన కారణాన్ని నిర్ధారించేందుకు నేపాల్ అధికారులు పరిశీలనలు ప్రారంభించారు. నేపాల్ భౌగోళిక స్వరూపం కారణంగా ఇలాంటి ప్రకృతి విపత్తులకు ఎక్కువగా గురయ్యే అవకాశం ఉందని నిపుణులు చెబుతున్నారు. ఎత్తైన హిమాలయ పర్వతాల నుంచి వేగంగా దిగువకు ప్రవహించే నదులు, కొండ ప్రాంతాల్లోని అస్థిర భూభాగం, వర్షాకాల పరిస్థితులు ప్రమాదాన్ని పెంచుతాయి. దీనికి తోడు వాతావరణ మార్పుల ప్రభావం కూడా పరిస్థితులను మరింత సంక్లిష్టంగా మారుస్తోందని నిపుణుల అభిప్రాయం. నేపాల్‌లోని నదులు దిగువ ప్రాంతాల వైపు ప్రవహించే నేపథ్యంలో పొరుగున ఉన్న భారత్‌లోని బిహార్, ఉత్తర్‌ప్రదేశ్ రాష్ట్రాలు కూడా అప్రమత్తమయ్యాయి. వరద పరిస్థితిని అధికారులు నిశితంగా పరిశీలిస్తున్నారు. మరోవైపు గల్లంతైన వారి ఆచూకీ కోసం సహాయక చర్యలు కొనసాగుతున్నాయి.