అమరావతి అసెంబ్లీకి సరికొత్త డిజైన్‌.. 265 స్థానాలకు అనుగుణంగా భవనం

అమరావతిని ప్రపంచంలోనే అద్భుతమైన రాజధానిగా తీర్చిదిద్దాలన్న లక్ష్యంతో అసెంబ్లీ భవన నిర్మాణానికి సరికొత్త డిజైన్‌ను రూపొందిస్తున్నట్లు మంత్రి నాదెండ్ల మనోహర్‌ తెలిపారు. రాజధాని భవనం భవిష్యత్‌ అవసరాలకు అనుగుణంగా ఉండేలా నిర్మాణ ప్రణాళికలను సిద్ధం చేస్తున్నట్లు చెప్పారు. భవిష్యత్‌లో జరిగే నియోజకవర్గాల డీలిమిటేషన్‌ను దృష్టిలో ఉంచుకుని అసెంబ్లీ, శాసనమండలి స్థానాల సంఖ్య పెరిగినా ఇబ్బందులు లేకుండా భవనాన్ని డిజైన్‌ చేస్తున్నట్లు మంత్రి వెల్లడించారు. మొత్తం 265 అసెంబ్లీ స్థానాలు, 110 శాసనమండలి స్థానాలకు అనుగుణంగా నిర్మాణ రూపకల్పనపై చర్చలు జరుగుతున్నాయని తెలిపారు. అసెంబ్లీ భవనం పైభాగంలో ప్రత్యేకమైన టవర్‌ను ఏర్పాటు చేయాలని ప్రణాళికలు రూపొందిస్తున్నారు. ఈ టవర్‌ నుంచి మొత్తం అమరావతి రాజధాని ప్రాంతాన్ని వీక్షించే అవకాశం ఉండేలా నిర్మాణాన్ని రూపొందించనున్నారు. దీంతో అసెంబ్లీ భవనం పరిపాలనా కార్యకలాపాలకే కాకుండా రాజధాని ప్రత్యేకతను చాటిచెప్పే ప్రముఖ నిర్మాణంగా నిలిచే అవకాశం ఉంది. అసెంబ్లీని సందర్శించే ప్రజలకు ప్రత్యేక అనుభూతి కలిగించేందుకు ఎక్స్‌పీరియన్స్‌ సెంటర్‌ ఏర్పాటు చేయాలని నిర్ణయించినట్లు మంత్రి తెలిపారు. అసెంబ్లీ కార్యకలాపాలు, శాసన ప్రక్రియ, ప్రజాస్వామ్య వ్యవస్థ గురించి సందర్శకులకు అవగాహన కల్పించేలా ఈ కేంద్రాన్ని అభివృద్ధి చేయాలని భావిస్తున్నారు. గవర్నర్‌ ప్రసంగించే సమయంలో అసెంబ్లీ, శాసనమండలి సభ్యులు ఒకే చోట కూర్చునేలా సెంట్రల్‌ హాల్‌ ఏర్పాటుకు అనువుగా డిజైన్‌ రూపొందిస్తున్నారు. మంత్రులు, విప్‌లు, కమిటీ చైర్మన్లు, ఎమ్మెల్యేలు, ఎమ్మెల్సీలకు మెరుగైన సదుపాయాలు కల్పించడం కూడా ఈ నిర్మాణ ప్రణాళికలో ప్రధాన లక్ష్యంగా ఉంది. అసెంబ్లీ ప్రాంగణం చుట్టూ విస్తృతంగా పచ్చదనం ఉండేలా, మొత్తం ప్రాంతం గార్డెన్‌లా కనిపించే విధంగా అభివృద్ధి చేయాలని సీఎం చంద్రబాబు సూచించినట్లు మంత్రి మనోహర్‌ తెలిపారు. ఆధునిక సదుపాయాలు, భవిష్యత్‌ అవసరాలు, సందర్శకుల అనుభవం, పర్యావరణహిత నిర్మాణ అంశాలను సమన్వయం చేస్తూ అమరావతి అసెంబ్లీకి కొత్త రూపాన్ని ఇవ్వాలని ప్రభుత్వం భావిస్తోంది.