అమెరికా ఆంక్షలపై ఇరాన్ కౌంటర్.. పూర్తి సిద్ధంగా ఉన్నామని హెచ్చరిక

అమెరికా కొత్తగా విస్తరించిన ఆర్థిక ఆంక్షలపై ఇరాన్ తీవ్రంగా స్పందించింది. అమెరికా చర్యలను ఎదుర్కొనేందుకు తమ దేశం పూర్తిగా సిద్ధంగా ఉందని ఇరాన్ ఆర్థిక మంత్రి అలీ మదానిజాదే ప్రకటించారు. తమపై ఆర్థిక దాడి జరిగితే ప్రతిదాడికి దిగుతామని ఆయన హెచ్చరించారు. అమెరికా విధించిన ఆంక్షలను ఆయన ‘ఆర్థిక ఉగ్ర దాడి’గా అభివర్ణించారు. అమెరికా ఆర్థిక ఆంక్షలకు ప్రతిస్పందించేందుకు ఇరాన్ వద్ద అవసరమైన మార్గాలు, సాధనాలు ఉన్నాయని మదానిజాదే తెలిపారు. తమ రక్షణ విధానం ఇకపై పూర్తిగా రక్షణాత్మకంగా ఉండబోదని, తమపై చర్యలకు దిగేవారు ప్రతిస్పందనను ఎదుర్కోవాల్సి ఉంటుందని హెచ్చరించారు. అమెరికా తాజా చర్యలను ఎదుర్కొనేందుకు ఇరాన్ వద్ద రెండు సంవత్సరాల ప్రణాళిక సిద్ధంగా ఉందని వెల్లడించారు. మరోవైపు, అమెరికా తాజా ఆంక్షలను ఎదుర్కొనే విషయంలో చైనా, రష్యా కూడా అసంతృప్తిగా ఉన్నాయని ఇరాన్ పేర్కొంది. అమెరికా ఆంక్షలు కొనసాగితే గల్ఫ్ ప్రాంతం నుంచి చమురు ఎగుమతులను పూర్తిగా నిలిపివేసే అవకాశం ఉందని ఇరాన్ ఇప్పటికే హెచ్చరికలు చేసినట్లు సమాచారం. ఆగస్టు 24న అమెరికా ట్రెజరీ కార్యదర్శి స్కాట్ బెసెంట్ ఇరాన్‌పై కొత్త ఆంక్షలను ప్రకటించారు. మొత్తం 60 మంది వ్యక్తులు, సంస్థలు, నౌకలను లక్ష్యంగా చేసుకుని ఈ ఆంక్షలు విధించినట్లు సమాచారం. ఇరాన్‌కు అందుబాటులో ఉన్న ఆర్థిక మార్గాలను మరింత కట్టడి చేయడం ఈ చర్యల ప్రధాన ఉద్దేశంగా అమెరికా పేర్కొంది. ఇరాన్‌తో వాణిజ్య సంబంధాలు కొనసాగించే దేశాలు, సంస్థలు కూడా భవిష్యత్తులో అమెరికా ఆంక్షలను ఎదుర్కొనే అవకాశం ఉందని వాషింగ్టన్ హెచ్చరించింది. దీంతో అమెరికా-ఇరాన్ మధ్య ఇప్పటికే ఉన్న ఉద్రిక్తతలు మరింత పెరిగే అవకాశాలపై అంతర్జాతీయంగా చర్చ జరుగుతోంది.