శ్రీశైలంలో భారీ వరద.. 162 టీఎంసీలకు చేరిన నీటి నిల్వ

కృష్ణా నది ఎగువ ప్రాంతాల నుంచి భారీగా వరద నీరు వచ్చి చేరడంతో శ్రీశైలం జలాశయం జలకళను సంతరించుకుంది. ఎగువ ప్రాంతాల్లో కురుస్తున్న వర్షాలతో జూరాల ప్రాజెక్టు నుంచి దిగువకు భారీగా నీటిని విడుదల చేస్తున్నారు. శుక్రవారం రాత్రి 9 గంటల సమయానికి జూరాల నుంచి 2,57,059 క్యూసెక్కుల నీరు విడుదల కాగా, అందులో 2,11,331 క్యూసెక్కులు శ్రీశైలం జలాశయానికి చేరుకున్నట్లు అధికారులు వెల్లడించారు. శ్రీశైలం జలాశయం పూర్తిస్థాయి నీటిమట్టం 885 అడుగులు కాగా, ప్రస్తుతం నీటిమట్టం 874.70 అడుగుల వద్ద ఉంది. పూర్తిస్థాయి నీటి నిల్వ సామర్థ్యం 215.81 టీఎంసీలు కాగా, ప్రస్తుతం 162.8190 టీఎంసీల నీటి నిల్వలు ఉన్నాయి. వరద ప్రవాహం ఇదే స్థాయిలో కొనసాగితే మరో మూడు రోజుల్లో నీటి నిల్వలు 200 టీఎంసీల మార్కును దాటే అవకాశం ఉందని అధికారులు అంచనా వేస్తున్నారు. వెలిగోడు ప్రాజెక్టుకు 4 వేల క్యూసెక్కుల నీటిని విడుదల చేశారు. శనివారం గోరకల్లుకు కూడా 4 వేల క్యూసెక్కుల నీటిని తరలించేందుకు అధికారులు చర్యలు చేపట్టారు. మరోవైపు శ్రీశైలం కుడి, ఎడమ గట్టు జలవిద్యుత్ కేంద్రాల్లో విద్యుత్ ఉత్పత్తి ప్రారంభమైంది. తెలంగాణ ఎడమ గట్టు విద్యుత్ కేంద్రంలో 21,189 క్యూసెక్కుల నీటితో 7.319 మిలియన్ యూనిట్ల విద్యుత్ ఉత్పత్తి చేయగా, కుడిగట్టు కేంద్రంలో 9,603 క్యూసెక్కుల నీటితో 1.684 మిలియన్ యూనిట్ల విద్యుత్ ఉత్పత్తి చేశారు. దిగువ ప్రాంతమైన నాగార్జునసాగర్‌కు 30,792 క్యూసెక్కుల నీటిని విడుదల చేస్తున్నారు. అధికారులు వరద పరిస్థితిని నిరంతరం పర్యవేక్షిస్తున్నారు.