మానవ–ఏనుగు సంఘర్షణ నివారణకు గుచ్చిమి కుంకీ శిబిరం ప్రారంభం

పార్వతీపురం మన్యం ప్రాంతంలో అడవి ఏనుగుల వల్ల ప్రజలు, రైతులు ఎదుర్కొంటున్న సమస్యలకు శాస్త్రీయ పరిష్కారం చూపే లక్ష్యంతో గుచ్చిమి కుంకీ ఏనుగుల శిబిరాన్ని ఏర్పాటు చేశారు. ఏపీ డిప్యూటీ సీఎం, అటవీ–పర్యావరణ శాఖ మంత్రి పవన్ కల్యాణ్ బుధవారం ఈ కేంద్రాన్ని వర్చువల్‌గా ప్రారంభించారు. అడవుల నుంచి బయటకు వచ్చే ఏనుగులు గ్రామాలు, పంట పొలాల్లోకి ప్రవేశించినప్పుడు వాటిని శిక్షిత కుంకీ ఏనుగుల సహాయంతో తిరిగి సురక్షిత ప్రాంతాలకు మళ్లించడం ఈ శిబిరం ప్రధాన లక్ష్యం. ఏనుగులను గాయపరచకుండా నియంత్రించడంతోపాటు ప్రజల ప్రాణాలు, పంటలు, ఆస్తులను రక్షించేందుకు శిక్షిత అటవీ బృందాలు ఇక్కడి నుంచి పనిచేయనున్నాయి. ఉత్తరాంధ్రలో పర్యటించినప్పుడు ఏనుగుల వల్ల ఎదురవుతున్న సమస్యలను స్థానిక రైతులు, గ్రామస్థులు తన దృష్టికి తీసుకొచ్చారని పవన్ కల్యాణ్ తెలిపారు. ఏనుగులు పంటలను ధ్వంసం చేయడంతోపాటు గ్రామాల సమీపంలో సంచరిస్తుండటంతో ప్రజలు భయాందోళనల మధ్య జీవిస్తున్నారని చెప్పారు. సమస్య వచ్చిన ప్రతిసారీ తాత్కాలికంగా స్పందించడం కాకుండా, దీర్ఘకాలికంగా పనిచేసే ప్రత్యేక కేంద్రాన్ని ఏర్పాటు చేయాలని నిర్ణయించినట్లు వివరించారు. గుచ్చిమి శిబిరం వల్ల సంఘర్షణ ప్రాంతాలకు కుంకీలు, అటవీ సిబ్బందిని తక్కువ సమయంలో పంపే అవకాశం ఏర్పడుతుంది. పలమనేరు ప్రాంతంలోని శిక్షణ కేంద్రం నుంచి జయంత్‌, అభిమన్యు అనే రెండు కుంకీ ఏనుగులను గుచ్చిమి శిబిరానికి తరలించారు. పార్వతీపురం మన్యం, ఒడిశా సరిహద్దు ప్రాంతాల్లో అడవి ఏనుగులను నియంత్రించే కార్యక్రమాల్లో వీటిని వినియోగించనున్నారు. కుంకీలు ప్రత్యేక శిక్షణ పొందిన ఏనుగులు. అనుభవజ్ఞులైన మావటీల సూచనలతో అడవి ఏనుగుల కదలికలను నియంత్రించడం, వాటిని జనావాసాల నుంచి దూరంగా మళ్లించడం వంటి పనుల్లో ఉపయోగపడతాయి. అయితే కుంకీలు స్వతంత్రంగా సమస్యను పరిష్కరించవు. అటవీశాఖ అధికారులు, పశువైద్యులు, స్థానిక పోలీసులు, గ్రామస్థాయి బృందాల మధ్య సమన్వయం తప్పనిసరి.