ఎయిర్ వైస్ మార్షల్ ర్యాంక్ సాధించిన తొలి మహిళా అధికారిణిగా శక్తి శర్మ

ఢిల్లీ, సెప్టెంబర్ 1: భారత వైమానిక దళంలో శక్తి శర్మ అరుదైన ఘనత సాధించారు. నాన్-మెడికల్ విభాగంలో ‘ఎయిర్ వైస్ మార్షల్’ ర్యాంక్‌ను అందుకున్న తొలి మహిళా అధికారిణిగా ఆమె చరిత్ర సృష్టించారు. సెప్టెంబర్ 1న ఎయిర్ హెడ్‌క్వార్టర్స్‌లో అసిస్టెంట్ చీఫ్ ఆఫ్ ది ఎయిర్ స్టాఫ్ (ఎడ్యుకేషన్)గా ఆమె పదవీ బాధ్యతలు స్వీకరించారు. శక్తి శర్మ 1994 జూన్ 18న భారత వైమానిక దళంలోని ఎడ్యుకేషన్ బ్రాంచ్‌లో అధికారిణిగా చేరారు. మూడు దశాబ్దాలకు పైగా సాగిన ఆమె సేవా కాలంలో ట్రైనింగ్ సెంటర్లు, ఫీల్డ్ స్టేషన్లు, కమాండ్ హెడ్‌క్వార్టర్స్, ఎయిర్ హెడ్‌క్వార్టర్స్‌లో పలు కీలక బాధ్యతలను నిర్వహించారు. విద్యా రంగంలోనూ శక్తి శర్మ కీలకంగా వ్యవహరించారు. ఐఐటీ కాన్పూర్, పుణె యూనివర్సిటీలలో రక్షణ రంగంతో విద్యా సహకారాన్ని పెంచేందుకు ‘IAF Chairs of Excellence’ ఏర్పాటు చేయడంలో ఆమె ప్రముఖ పాత్ర పోషించారు. అంతేకాకుండా, ట్రై-సర్వీసెస్ చరిత్రలో ఒక సైనిక పాఠశాలకు కమాండింగ్ ఆఫీసర్‌గా వ్యవహరించిన తొలి మహిళా అధికారిణిగా కూడా ఆమె గుర్తింపు పొందారు. కపూర్తలా సైనిక పాఠశాల ప్రిన్సిపాల్‌గా ఆమె బాధ్యతలు నిర్వహించారు. మూడు దశాబ్దాల సుదీర్ఘ సేవా ప్రయాణం అనంతరం శక్తి శర్మ సాధించిన ఈ ఘనత భారత సాయుధ దళాల్లో మహిళల ప్రాతినిధ్యానికి ప్రాధాన్యాన్ని చాటుతోంది. భవిష్యత్‌లో సైనిక రంగంలోకి అడుగుపెట్టే మహిళా అధికారులకు ఆమె ప్రయాణం స్ఫూర్తిగా నిలుస్తుంది.