నేపాల్ వరదలు.. రసువాగఢి టన్నెల్‌లో 93 మంది కార్మికులు గల్లంతు.. గాలింపు నిలిపివేత

నేపాల్‌లో భారీ వరదలు తీవ్ర విషాదాన్ని మిగిల్చాయి. రసువా జిల్లాలోని రసువాగఢి జలవిద్యుత్ ప్రాజెక్టు టన్నెల్‌లో పనిచేస్తున్న 93 మంది కార్మికుల ఆచూకీ తెలియకుండా పోయింది. ఆగస్టు 26న భోటే కోషి నదిలో వరద ఉధృతి ఒక్కసారిగా పెరగడంతో ఈ పరిస్థితి ఏర్పడినట్లు సమాచారం. వరదల సమయంలో కార్మికులు టన్నెల్‌లోనే చిక్కుకుపోయి ఉండొచ్చన్న అనుమానాలతో సహాయక చర్యలు చేపట్టారు. నేపాలీ ఆర్మీ ఆధ్వర్యంలో ప్రత్యేక బృందాలు టన్నెల్‌లోకి ప్రవేశించి గాలింపు చేపట్టాయి. టన్నెల్‌లోని కొన్ని ప్రాంతాలను ప్రత్యక్షంగా పరిశీలించడం ప్రమాదకరంగా ఉండటంతో థర్మల్ డ్రోన్లను ఉపయోగించారు. డ్రోన్ల బృందం టన్నెల్ చివరి భాగం వరకు వెళ్లి తనిఖీలు చేసినప్పటికీ అక్కడ మనుషులు ఉన్నట్లు ఎలాంటి సంకేతాలు లభించలేదు. దీంతో గాలింపు చర్యలను నిలిపివేసినట్లు నేపాల్ ప్రధానమంత్రి కార్యాలయం సోమవారం వెల్లడించింది. ఇదిలా ఉండగా, నేపాల్‌లోని పలు జలవిద్యుత్ ప్రాజెక్టుల్లోని భూగర్భ టన్నెల్‌లలో పనిచేస్తున్న కార్మికులు వరదల ప్రభావానికి గురయ్యారు. వివిధ హైడ్రోపవర్ ప్రాజెక్టులకు చెందిన 933 మంది కార్మికులు గల్లంతైనట్లు నేపాల్ ప్రభుత్వం తెలిపింది. ఇప్పటివరకు వివిధ ప్రాజెక్టుల టన్నెల్‌ల నుంచి 279 మందిని రక్షించినట్లు వెల్లడించింది. అయితే మిగిలిన కార్మికులు టన్నెల్‌లలోనే ఉన్నారా, సురక్షిత ప్రాంతాలకు చేరుకున్నారా లేదా వరద ప్రవాహంలో కొట్టుకుపోయారా అనే విషయం స్పష్టంగా తెలియడం లేదని సమాచారం.