2027 గోదావరి పుష్కరాలకు భారీ ఏర్పాట్లు.. 96 ప్రాంతాల్లో మౌలిక వసతుల అభివృద్ధి

గోదావరి పుష్కరాలు-2027ను ప్రతిష్ఠాత్మకంగా నిర్వహించేందుకు తెలంగాణ ప్రభుత్వం సన్నాహాలు ప్రారంభించింది. ఈ మేరకు శుక్రవారం రాష్ట్ర సచివాలయంలో మంత్రి శ్రీధర్‌బాబు అధ్యక్షతన కేబినెట్‌ సబ్‌ కమిటీ సమావేశం జరిగింది. పుష్కరాల ఏర్పాట్లు, మౌలిక వసతుల అభివృద్ధి, శాఖల సమన్వయం వంటి అంశాలపై సమావేశంలో కీలకంగా చర్చించారు. 2027 జూన్‌ 26 నుంచి జులై 7 వరకు గోదావరి పుష్కరాలు జరగనున్నాయి. బృహస్పతి సింహరాశిలోకి ప్రవేశించిన సమయంలో ప్రతి 12 సంవత్సరాలకు ఒకసారి గోదావరి నదికి పుష్కరాలు నిర్వహించడం ఆనవాయితీగా వస్తోంది. ఈ సందర్భంగా భక్తులు పవిత్ర స్నానాలు, పితృ తర్పణాలు, ప్రత్యేక పూజలు నిర్వహిస్తారు. గత పుష్కరాల అనుభవాలను దృష్టిలో ఉంచుకుని ఈసారి తెలంగాణ ప్రభుత్వం మరింత విస్తృత ఏర్పాట్లు చేయాలని నిర్ణయించింది. తెలంగాణ సంస్కృతి, ఆధ్యాత్మిక వారసత్వాన్ని ప్రతిబింబించేలా పుష్కరాలను నిర్వహించేందుకు ప్రణాళికలు రూపొందిస్తున్నారు. గోదావరి ప్రవహించే జిల్లాల్లోని ప్రముఖ దేవాలయాలను అనుసంధానిస్తూ దాదాపు 96 ప్రాంతాలను పుష్కర కేంద్రాలుగా అభివృద్ధి చేయాలని ప్రభుత్వం భావిస్తోంది. భక్తుల రద్దీకి అనుగుణంగా పుష్కర ఘాట్లు, రహదారులు, తాగునీటి సదుపాయాలు, పారిశుద్ధ్య నిర్వహణ, వాహనాల పార్కింగ్‌ వంటి అంశాలపై ప్రత్యేక ప్రణాళికలు రూపొందించనున్నారు. తెలంగాణతో పాటు ఇతర రాష్ట్రాల నుంచి లక్షలాది మంది భక్తులు పుష్కరాలకు వచ్చే అవకాశం ఉందని ప్రభుత్వం అంచనా వేస్తోంది. అందుకు అనుగుణంగా అన్ని శాఖలు సమన్వయంతో పనిచేసేలా చర్యలు తీసుకుంటున్నారు. గోదావరి పుష్కరాలు రాష్ట్రానికి ఆధ్యాత్మికంగానే కాకుండా పర్యాటక, ఆర్థిక పరంగా కూడా కీలకంగా మారే అవకాశం ఉందని అధికారులు భావిస్తున్నారు.