ఇరాన్ అణు రహస్యాలు చెబితే రూ.170 కోట్లు.. భారీ రివార్డు ప్రకటించిన అమెరికా

ఇంటర్నెట్ డెస్క్: ఇరాన్ అణు కార్యక్రమానికి సంబంధించిన రహస్య సమాచారాన్ని సేకరించేందుకు అమెరికా ప్రభుత్వం కీలక ప్రకటన చేసింది. ఇరాన్ అణు కార్యకలాపాలకు సంబంధించిన విశ్వసనీయ సమాచారం అందించే వారికి గరిష్ఠంగా 20 మిలియన్ డాలర్లు (సుమారు రూ.170 కోట్లు) వరకు బహుమతి అందించనున్నట్లు ప్రకటించింది. అమెరికా విదేశాంగ శాఖకు చెందిన 'రివార్డ్స్ ఫర్ జస్టిస్' కార్యక్రమం ద్వారా ఈ రివార్డును ప్రకటించినట్లు యూఎస్ సెంట్రల్ కమాండ్ వెల్లడించింది. ఇరాన్‌లోని అణు కేంద్రాలు, వాటికి సంబంధించిన పరికరాలు, సాంకేతిక వ్యవస్థలు, అణు కార్యక్రమంలో పనిచేస్తున్న శాస్త్రవేత్తలు, ఇతర సిబ్బందికి సంబంధించిన సమాచారాన్ని అందించాలని కోరింది. సమాచారం అందించే వ్యక్తుల భద్రతకు కూడా ప్రాధాన్యం ఇస్తామని అమెరికా తెలిపింది. అవసరాన్ని బట్టి వారికి సురక్షిత ప్రాంతానికి తరలించే ఏర్పాట్లు చేస్తామని పేర్కొంది. అయితే ఏ స్థాయి సమాచారం అందిస్తే పూర్తి స్థాయిలో 20 మిలియన్ డాలర్ల బహుమతి లభిస్తుందనే విషయంపై స్పష్టమైన వివరాలు వెల్లడించలేదు. మరోవైపు, ఇరాన్ అణు కార్యక్రమాన్ని అమెరికా సైన్యం తీవ్రంగా దెబ్బతీసిందని అధ్యక్షుడు డొనాల్డ్ ట్రంప్ గతంలో పలుమార్లు వ్యాఖ్యానించినట్లు కథనం పేర్కొంది. ఇరాన్ వద్ద అణ్వాయుధాలు ఉంటే పశ్చిమాసియా ప్రాంతానికి ప్రమాదం ఏర్పడేదని ఆయన అభిప్రాయపడ్డారు. ఇరాన్ ఆర్థిక, సైనిక వ్యవస్థలు బలహీనపడ్డాయని, ఆ దేశం యుద్ధానికి ముగింపు పలికేందుకు సిద్ధంగా ఉందని ట్రంప్ పేర్కొన్నట్లు వార్తా కథనం తెలిపింది. ఈ నేపథ్యంలో అణు కార్యక్రమానికి సంబంధించిన సమాచారాన్ని సేకరించేందుకు అమెరికా ప్రకటించిన భారీ రివార్డు అంతర్జాతీయంగా ప్రాధాన్యం సంతరించుకుంది.