కమల్ హాసన్, రజనీకాంత్‌కు సాధ్యం కానిది.. విజయ్‌కు ఎలా సాధ్యమైంది?

తమిళనాడులో సినిమా, రాజకీయాలు రెండింటినీ వేర్వేరుగా చూడటం చాలా కష్టం. రాష్ట్ర రాజకీయ చరిత్రలో సినీ రంగం నుంచి వచ్చిన పలువురు ప్రముఖులు ముఖ్యమైన పాత్ర పోషించారు. గతంలో ముఖ్యమంత్రులుగా పనిచేసిన ఎంజీఆర్‌, కరుణానిధి, జయలలిత వంటి నాయకులకు సినిమా రంగంతో సంబంధం ఉంది. ముఖ్యంగా ఎంజీఆర్‌ తన సినీ అభిమానాన్ని రాజకీయ శక్తిగా మార్చుకుని పార్టీని స్థాపించి ముఖ్యమంత్రి స్థాయికి ఎదిగారు. ఆ తర్వాత శివాజీ గణేషన్‌, విజయ్‌కాంత్‌, శరత్‌కుమార్‌, కమల్‌ హాసన్‌, రజనీకాంత్‌ వంటి పలువురు నటులు రాజకీయాల్లోకి రావడానికి ప్రయత్నించారు. అయితే వారందరూ తమ సినీ ఇమేజ్‌, అభిమానుల సంఖ్యను ఎంజీఆర్‌ స్థాయిలో రాజకీయ బలంగా మార్చుకోలేకపోయారు. ఈ నేపథ్యంలో విజయ్‌ రాజకీయ ప్రస్థానం ప్రత్యేకంగా చర్చనీయాంశంగా మారింది. ముందుగానే రాజకీయ పునాది విజయ్‌ రాజకీయాల్లోకి అధికారికంగా అడుగుపెట్టే ముందు నుంచే తన అభిమాన సంఘాల నెట్‌వర్క్‌ను విస్తరించుకుంటూ వచ్చారు. దాదాపు పదేళ్లుగా అభిమాన సంఘాలు కేవలం సినిమా ప్రచారానికే పరిమితం కాకుండా సామాజిక సేవా కార్యక్రమాల్లోనూ పాల్గొన్నాయి. తమిళనాడు వ్యాప్తంగా విజయ్‌కు 85 వేలకు పైగా అభిమాన సంఘాలు ఉన్నాయని కథనం పేర్కొంది. ఈ నెట్‌వర్క్‌ క్రమంగా ఒక రాజకీయ సంస్థ మాదిరిగా పనిచేసే స్థాయికి చేరింది. ప్రజలతో సంబంధాలను కొనసాగించడం, సామాజిక కార్యక్రమాల్లో పాల్గొనడం ద్వారా అభిమాన సంఘాలు విజయ్‌కు క్షేత్రస్థాయిలో పరిచయాన్ని పెంచాయి. 2021 స్థానిక ఎన్నికలు కీలక మలుపు విజయ్‌ అభిమాన సంఘాల రాజకీయ సామర్థ్యానికి 2021లో జరిగిన స్థానిక ఎన్నికలు ఒక ఉదాహరణగా నిలిచాయని కథనం పేర్కొంది. తొమ్మిది జిల్లాల్లోని 169 స్థానాల్లో పోటీ చేసిన అభిమాన సంఘాల సభ్యులు 129 చోట్ల విజయం సాధించినట్లు తెలిపింది. ఈ ఫలితాలు విజయ్‌కు రాజకీయాల్లోకి రావడానికి మరింత ధైర్యాన్ని ఇచ్చినట్లు కథనం విశ్లేషించింది. అంటే విజయ్‌ రాజకీయాల్లోకి వచ్చిన తర్వాత అభిమానులను రాజకీయ కార్యకర్తలుగా మార్చే ప్రయత్నం చేయడం కంటే, ముందుగానే ఉన్న నెట్‌వర్క్‌ను రాజకీయ కార్యకలాపాలకు ఉపయోగించుకునేలా తీర్చిదిద్దినట్లు ఈ కథనం సూచిస్తోంది. యువత విజయ్‌ వైపు ఎందుకు ఆకర్షితులవుతున్నారు? కమల్‌ హాసన్‌, రజనీకాంత్‌తో పోలిస్తే విజయ్‌కు మరో అనుకూల అంశం ఆయన వయసు అని కథనం పేర్కొంది. రజనీకాంత్‌ పార్టీ పెట్టే సమయంలో ఆయన వయసు 70 ఏళ్లు కాగా, కమల్‌ హాసన్‌ వయసు 65 ఏళ్లకు పైగా ఉంది. విజయ్‌ మాత్రం 51 ఏళ్ల వయసులో రాజకీయాల్లోకి వచ్చారు. దీంతో యువతలో విజయ్‌కు ప్రత్యేకమైన ఆదరణ ఏర్పడిందని కథనం చెబుతోంది. 40 ఏళ్ల లోపు వయసున్న భారీ సంఖ్యలో యువ ఓటర్లు ఆయనకు మద్దతుగా నిలిచారని పేర్కొంది. సోషల్‌ మీడియాలో చురుకైన ప్రచారం కూడా ఈ యువతను చేరుకోవడంలో విజయ్‌కు ఉపయోగపడింది. ద్రవిడ పార్టీలకు ప్రత్యామ్నాయంగా చూపించే ప్రయత్నం తమిళనాడులో ఎన్నో దశాబ్దాలుగా డీఎంకే, అన్నాడీఎంకే వంటి ద్రవిడ రాజకీయ పార్టీలు బలంగా ఉన్నాయి. ఈ నేపథ్యంలో తన పార్టీని వాటికి భిన్నమైన రాజకీయ ప్రత్యామ్నాయంగా చూపించడానికి విజయ్‌ ప్రయత్నించారని కథనం పేర్కొంది. డీఎంకే, అన్నాడీఎంకే విధానాలపై విమర్శలు చేయడం ద్వారా పట్టణ ప్రాంతాలు, యువ ఓటర్లలో తనకు ప్రత్యేక రాజకీయ గుర్తింపు తీసుకురావడానికి ప్రయత్నించారు. గతంలో కమల్‌ హాసన్‌, రజనీకాంత్‌ తమ పార్టీలను ఈ స్థాయిలో ప్రత్యామ్నాయ రాజకీయ శక్తిగా చూపించడంలో ఇబ్బందులు ఎదుర్కొన్నారని కథనం విశ్లేషిస్తోంది. సినిమాలకు వీడ్కోలు.. పూర్తి స్థాయి రాజకీయాలపై దృష్టి విజయ్‌ రాజకీయ ప్రస్థానంలో మరో కీలక అంశం సినిమాలను విడిచిపెట్టి పూర్తిస్థాయిలో రాజకీయాల్లో పనిచేయాలన్న నిర్ణయం. దాదాపు మూడు దశాబ్దాల సినీ కెరీర్‌ ఉన్నప్పటికీ, రాజకీయాల కోసం తన స్టార్‌ ఇమేజ్‌ను పక్కన పెట్టేందుకు ఆయన సిద్ధమయ్యారని కథనం చెబుతోంది. ప్రచార కార్యక్రమాల్లో తన స్టార్‌ పవర్‌తో పాటు ప్రజలతో భావోద్వేగ అనుబంధాన్ని పెంచుకునే ప్రయత్నం చేశారు. అదే సమయంలో సంక్షేమానికి ప్రాధాన్యం ఇస్తామని మేనిఫెస్టో ద్వారా హామీ ఇవ్వడం ద్వారా ప్రజల్లో నమ్మకం కల్పించేందుకు ప్రయత్నించారు. మొత్తంగా చూస్తే, విజయ్‌ రాజకీయ ప్రయాణానికి కేవలం సినీ స్టార్‌డమ్‌ మాత్రమే కారణం కాదని ఈ కథనం విశ్లేషిస్తోంది. ముందుగానే నిర్మించుకున్న అభిమాన సంఘాల నెట్‌వర్క్‌, సామాజిక సేవ, యువతతో అనుసంధానం, సోషల్‌ మీడియా వినియోగం, ద్రవిడ పార్టీలకు ప్రత్యామ్నాయంగా తనను తాను ప్రొజెక్ట్‌ చేసుకోవడం, అలాగే పూర్తిస్థాయి రాజకీయాల్లోకి రావాలన్న నిర్ణయం ఆయన వ్యూహంలో ముఖ్యమైన అంశాలుగా కనిపిస్తున్నాయి.