గడులపై గెలుపు వ్యూహం.. విమెన్‌ ఇంటర్నేషనల్‌ మాస్టర్‌గా నిహారిక!

గుంటూరుకు చెందిన కోనేరు చల్ల నిహారిక చెస్‌లో పట్టుదల, క్రమశిక్షణ, నిరంతర సాధనకు ప్రతీకగా నిలిచింది. సరదాగా మొదలైన ఆమె చెస్‌ ప్రయాణం ఎన్నో సవాళ్లను దాటుకుంటూ విమెన్‌ ఇంటర్నేషనల్‌ మాస్టర్‌ (WIM) బిరుదు సాధించే స్థాయికి చేరింది. 2011లో నిహారిక తొలిసారిగా చెస్‌ ఆడటం ప్రారంభించింది. మొదటి టోర్నమెంట్‌లోనే మంచి ఫలితం సాధించడంతో ఆమెకు ఈ క్రీడపై ఆసక్తి పెరిగింది. 2011 నుంచి 2014 వరకు గుంటూరులోని జీనియస్‌ చెస్‌ అకాడమీలో రవీంద్ర రాజు వద్ద శిక్షణ పొందింది. చెస్‌ మెళకువలతో పాటు క్రమశిక్షణ, ఓర్పు, ఓటముల నుంచి పాఠాలు నేర్చుకోవడం వంటి అంశాలను కూడా ఆమె అక్కడే అలవర్చుకుంది. తర్వాత హైదరాబాద్‌లోని స్కై చెస్‌ అకాడమీలో చేరిన నిహారిక తన ఆటను మరింత సీరియస్‌గా తీసుకుంది. కొన్ని సందర్భాల్లో రోజుకు 12 గంటలకు పైగా సాధన చేసినట్లు ఆమె తెలిపింది. అజయ్‌ ముషిణి, సాయి కిరణ్‌ యార్లగడ్డ మార్గదర్శకత్వంలో తన ఆటలోని లోపాలను గుర్తించి మెరుగుపరుచుకుంది. ఈ ప్రయాణంలో కఠినమైన సాధనతో పాటు ఎన్నో త్యాగాలు చేయాల్సి వచ్చింది. అయితే కష్టపడుతున్నప్పటికీ ఆమె చెస్‌ రేటింగ్‌ సుమారు ఐదేళ్లపాటు పెద్దగా పెరగలేదు. ఈ సమయంలో నిరాశకు గురైనప్పటికీ ఆటను వదిలిపెట్టలేదు. రేటింగ్‌ గురించి ఆలోచించడం కంటే తన ఆటలోని లోపాలను గుర్తించి వాటిని సరిదిద్దుకోవడంపైనే దృష్టి పెట్టింది. గెలుపు, ఓటములను సమానంగా స్వీకరించి ప్రతి గేమ్‌ నుంచి నేర్చుకోవడం ఆమె విజయానికి కీలకంగా మారింది. గత ఏడాదిలో నిహారిక 300కు పైగా ఎలో రేటింగ్‌ పాయింట్లు పెంచుకుంది. దీనికి నిరంతర ప్రాక్టీస్‌, మంచి కోచింగ్‌, ప్రతి గేమ్‌ను విశ్లేషించడం, చేసిన తప్పులను మళ్లీ చేయకుండా జాగ్రత్తపడటం ప్రధాన కారణాలని ఆమె పేర్కొంది. రేటింగ్‌ కోసం కాకుండా తన ఆటను మెరుగుపరచుకోవడానికే ప్రాధాన్యం ఇవ్వడం వల్ల రేటింగ్‌ సహజంగానే పెరిగిందని చెప్పింది. అంతర్జాతీయ స్థాయిలో తన లక్ష్యాన్ని చేరుకునే క్రమంలో బెల్‌గ్రేడ్‌ జీఎం మిక్స్‌, హంగేరీలో వెలెర్కెప్టో ఐఎం రౌండ్‌ రాబిన్‌, స్పెయిన్‌లో పొంటేవేద్రా మాస్టర్స్‌ ఓపెన్‌ వంటి టోర్నమెంట్లలో మూడు విమెన్‌ ఇంటర్నేషనల్‌ మాస్టర్‌ నార్మ్‌లు సాధించింది. అనంతరం అవసరమైన ఫిడే రేటింగ్‌ను కూడా సాధించడంతో ఆమె WIM బిరుదు పూర్తి అయింది. చెస్‌తో పాటు నిహారిక చదువులోనూ ముందుకు సాగింది. ఇటీవల ఎంబీఏ పూర్తి చేసిన ఆమె చదువు, చెస్‌ రెండింటినీ సమన్వయం చేసుకోవడానికి టైమ్‌ మేనేజ్‌మెంట్‌ను అలవాటు చేసుకుంది. చెస్‌ తనకు ఏకాగ్రత, క్రమశిక్షణ నేర్పగా, చదువు కొత్త ఆలోచనా విధానాన్ని అందించిందని ఆమె పేర్కొంది. రష్యా దిగ్గజ చెస్‌ క్రీడాకారుడు గ్యారీ కాస్పరోవ్‌, భారత స్టార్‌ చెస్‌ క్రీడాకారిణి కోనేరు హంపి తనకు స్ఫూర్తి అని నిహారిక తెలిపింది. అయితే విమెన్‌ ఇంటర్నేషనల్‌ మాస్టర్‌ బిరుదుతో తన ప్రయాణాన్ని ముగించాలనే ఆలోచన ఆమెకు లేదు. గ్రాండ్‌మాస్టర్‌ బిరుదు సాధించడమే తదుపరి ప్రధాన లక్ష్యంగా పెట్టుకుంది. నిహారిక ప్రయాణం చెప్పే ముఖ్యమైన సందేశం ఒక్కటే—రేటింగ్‌ తగ్గినా, విజయాలు ఆలస్యమైనా ప్రయత్నాన్ని ఆపకూడదు. ఓటమిని అంతంగా కాకుండా మన లోపాలను తెలుసుకునే అవకాశంగా తీసుకుని ముందుకు సాగితే లక్ష్యాన్ని సాధించవచ్చని ఆమె ప్రయాణం నిరూపిస్తోంది.