అమెరికాలో హైదరాబాద్ యువకుడి మృతి.. పెళ్లైన 17 రోజులకే విషాదం

అమెరికాలో తెలంగాణకు చెందిన 28 ఏళ్ల యువకుడు అనుమానాస్పద పరిస్థితుల్లో మృతిచెందడం హైదరాబాద్‌లోని అతని కుటుంబంలో తీవ్ర విషాదాన్ని నింపింది. హైదరాబాద్‌కు చెందిన సివిల్‌ ఇంజినీర్‌ మహమ్మద్‌ జాబెర్‌ హుస్సేన్‌ మసాచుసెట్స్‌లోని లోవెల్‌లో నివసిస్తున్నాడు. సెప్టెంబర్‌ 14న కుటుంబ సభ్యులతో ఫోన్‌లో మాట్లాడిన జాబెర్‌.. ఆ తర్వాత గంటల వ్యవధిలోనే తన గదిలో నిద్రలోనే మృతిచెందినట్లు రూమ్‌మేట్‌ కుటుంబ సభ్యులకు సమాచారం ఇచ్చాడు. జాబెర్‌కు ఆగస్టు 28న టెక్సాస్‌లో వివాహం జరిగింది. పెళ్లైన కేవలం 17 రోజులకే అతను మృతిచెందడంతో కుటుంబ సభ్యులు తీవ్ర విషాదంలో మునిగిపోయారు. వివాహం అనంతరం జాబెర్‌ మసాచుసెట్స్‌కు తిరిగి వెళ్లినట్లు సమాచారం. అయితే అతని భార్య కూడా అతనితో కలిసి మసాచుసెట్స్‌కు వెళ్లిందా లేదా అనే విషయం స్పష్టంగా తెలియలేదని కథనం పేర్కొంది. జాబెర్‌ మృతికి గల కచ్చితమైన కారణాలు ఇంకా స్పష్టంగా తెలియలేదు. పోస్టుమార్టం నివేదిక వచ్చిన తర్వాతే పూర్తి వివరాలు తెలిసే అవకాశం ఉందని కుటుంబ సభ్యులు తెలిపారు. ఈ ఘటనపై స్థానిక అధికారులు దర్యాప్తు చేస్తున్నట్లు పేర్కొన్నారు. ఇదిలా ఉండగా, జాబెర్‌ మృతదేహాన్ని అమెరికా నుంచి హైదరాబాద్‌కు తీసుకురావడానికి కేంద్ర ప్రభుత్వం సహాయం చేయాలని అతని తండ్రి కోరారు. ఈ మేరకు కేంద్ర విదేశాంగ శాఖ మంత్రి ఎస్‌. జైశంకర్‌కు లేఖ రాశారు. అమెరికాలోని భారత దౌత్య కార్యాలయం, స్థానిక అధికారులతో సమన్వయం చేసి అవసరమైన ప్రక్రియను పూర్తి చేయాలని విజ్ఞప్తి చేశారు.