మోదీతో ‘తుఝే దేఖా తో’.. పుతిన్‌తో ‘చలే చలో’: మలేషియా ప్రధాని బాలీవుడ్ ప్లేలిస్ట్ వైరల్

మలేషియా ప్రధాని అన్వర్ ఇబ్రహీం భారత్ పర్యటన సందర్భంగా సోషల్ మీడియాలో చేసిన పోస్టులు ప్రత్యేకంగా ఆకట్టుకుంటున్నాయి. ఢిల్లీలో జరిగిన 18వ బ్రిక్స్ శిఖరాగ్ర సదస్సుకు హాజరైన ఆయన.. తన పర్యటనకు సంబంధించిన ఫొటోలు, వీడియోలను ఇన్‌స్టాగ్రామ్‌లో పంచుకున్నారు. అయితే వాటికి ఎంచుకున్న బాలీవుడ్ పాటలు నెటిజన్ల దృష్టిని ఆకర్షించాయి. భారత్ మండపంలో భారత ప్రధాని నరేంద్ర మోదీ తనకు స్వాగతం పలికిన వీడియోను అన్వర్ ఇబ్రహీం పోస్ట్ చేసి, షారుక్ ఖాన్, కాజోల్ నటించిన ‘దిల్‌వాలే దుల్హనియా లే జాయేంగే’ సినిమాలోని ‘తుఝే దేఖా తో యే జానా సనం’ పాటను జత చేశారు. మోదీతో కలిసి ఉన్న మరో ఫొటోకు ‘దిల్ తో పాగల్ హై’ చిత్రంలోని టైటిల్ సాంగ్‌ను ఉపయోగించారు. బ్రిక్స్ సదస్సులో ప్రసంగిస్తున్న ఫొటోలకు ‘హర్ దిల్ జో ప్యార్ కరేగా’ పాటను ఎంచుకున్నారు. భారత్ నుంచి తిరుగు ప్రయాణానికి సంబంధించిన షార్ట్ వీడియోలకు ‘లక్ష్య’ సినిమాలోని ‘కంధోం సే మిల్తే హై కంధే’ పాటను జత చేశారు. ఈ పాటలు కలిసి ముందుకు సాగడం, ఐక్యత వంటి భావాలను ప్రతిబింబిస్తాయి. కాంగ్రెస్ నేతలు రాహుల్ గాంధీ, ప్రియాంక గాంధీలను కలిసిన సందర్భంలో తీసుకున్న ఫొటోలకు ‘వీర్-జారా’ సినిమాలోని ‘ఐసా దేశ్ హై మేరా’ పాటను జత చేశారు. భారతదేశంలోని వైవిధ్యం, భిన్న సంస్కృతులను ప్రతిబింబించేలా ఈ పాటను ఎంచుకున్నారు. ఇరాన్ అధ్యక్షుడు మసూద్ పెజెష్కియన్‌తో సమావేశమైన ఫొటోకు ‘నయా దౌర్’ సినిమాలోని ‘సాథీ హాత్ బఢానా’ పాటను ఉపయోగించారు. అదే విధంగా రష్యా అధ్యక్షుడు వ్లాదిమిర్ పుతిన్‌తో కలిసి దిగిన ఫొటోకు అమీర్ ఖాన్ నటించిన ‘లగాన్’ చిత్రంలోని ‘చలే చలో’ పాటను జత చేశారు. కలిసి ముందుకు సాగాలనే సందేశాన్ని ఈ పాటలు అందించడంతో అన్వర్ ఇబ్రహీం పోస్టులు ఆసక్తికరంగా మారాయి. బాలీవుడ్ సంగీతాన్ని దౌత్య సందర్భాల్లో ఉపయోగించిన నేతగా అన్వర్ ఇబ్రహీం మాత్రమే కాకుండా, ఇండోనేషియా విదేశాంగ మంత్రి సుగియోనో కూడా భారత్ పర్యటన సందర్భంగా బాలీవుడ్ సంగీతాన్ని ఉపయోగించారు. దీంతో బ్రిక్స్ సదస్సు సందర్భంగా రాజకీయాలు, దౌత్యంతో పాటు బాలీవుడ్ పాటలు కూడా సోషల్ మీడియాలో చర్చనీయాంశంగా మారాయి.