ఆత్మహత్యల నివారణకు బహుముఖ వ్యూహం.. మంత్రి సత్యకుమార్ కీలక ప్రకటన

అమరావతి, సెప్టెంబర్ 9: ఆత్మహత్యల నివారణకు ఆంధ్రప్రదేశ్ ప్రభుత్వం ప్రత్యేక చర్యలు చేపడుతోందని వైద్య, ఆరోగ్య శాఖ మంత్రి సత్యకుమార్ యాదవ్ తెలిపారు. ఆత్మహత్యల నివారణ కోసం బహుముఖ వ్యూహాన్ని అమలు చేస్తామని ఆయన ప్రకటించారు. ప్రపంచ ఆత్మహత్యల నివారణ దినోత్సవం సందర్భంగా మానసిక ఆరోగ్య సేవలను మరింత విస్తరించేందుకు రాష్ట్ర ప్రభుత్వం చర్యలు తీసుకుంటోందని మంత్రి వెల్లడించారు. ఈ మేరకు బుధవారం ఆయన ఒక ప్రకటన విడుదల చేశారు. మానసిక ఒత్తిడి, ఆందోళన వంటి సమస్యలను ఎదుర్కొంటున్న వారికి సకాలంలో సహాయం అందించేందుకు టెలీ-మానస్ 14416 ద్వారా కౌన్సెలింగ్ సేవలను అందుబాటులోకి తీసుకువస్తామని తెలిపారు. ప్రజలు మానసిక సమస్యలను దాచుకోకుండా అవసరమైన సమయంలో సహాయం పొందాలని సూచించారు. అలాగే పాఠశాలలు, కళాశాలల్లో విస్తృత స్థాయిలో అవగాహన కార్యక్రమాలు నిర్వహిస్తామని మంత్రి పేర్కొన్నారు. విద్యార్థుల్లో మానసిక ఆరోగ్యంపై అవగాహన పెంచేందుకు ప్రత్యేక కార్యక్రమాలు చేపడతామన్నారు. గ్రామీణ స్థాయిలో సమస్యలను గుర్తించేందుకు ఆశా కార్యకర్తలు, ఏఎన్‌ఎంలకు గేట్‌కీపర్ ప్రత్యేక శిక్షణ అందిస్తామని తెలిపారు. మానసిక ఒత్తిడికి సంబంధించిన సంకేతాలను ముందుగానే గుర్తించేలా ఉపాధ్యాయులకు కూడా శిక్షణ ఇవ్వనున్నట్లు చెప్పారు. మానసిక ఆరోగ్య పరిరక్షణకు సమాజంలోని ప్రతి ఒక్కరూ భాగస్వాములు కావాలని మంత్రి సత్యకుమార్ యాదవ్ పిలుపునిచ్చారు.