చిన్న ప్రయత్నానికి పెద్ద గౌరవం.. ‘కమిటీ కుర్రోళ్లు’కు రెండు జాతీయ అవార్డులు

తెలుగు చిత్ర పరిశ్రమలో కొత్త నటీనటులు, సాంకేతిక నిపుణులతో రూపొందిన ‘కమిటీ కుర్రోళ్లు’ జాతీయ స్థాయిలో సత్తా చాటింది. 2024 సంవత్సరానికి సంబంధించిన 72వ జాతీయ చలనచిత్ర పురస్కారాల్లో ఈ సినిమా ఉత్తమ తెలుగు చిత్రంగా ఎంపికైంది. పింక్‌ ఎలిఫెంట్‌ పిక్చర్స్‌, శ్రీ రాధా దామోదర స్టూడియోస్‌ సంయుక్తంగా నిర్మించిన చిత్రానికి యదు వంశీ దర్శకత్వం వహించారు. ఉత్తమ తెలుగు చిత్రం విభాగంలో నిర్మాతలు, దర్శకుడికి రజత కమలంతోపాటు నగదు పురస్కారం దక్కనుంది. ‘కమిటీ కుర్రోళ్లు’కు మరో సాంకేతిక పురస్కారం కూడా లభించింది. చిత్రానికి పనిచేసిన పి.రవికుమార్‌ ఉత్తమ మేకప్‌ కళాకారుడిగా ఎంపికయ్యారు. దీంతో ఈ సినిమా రెండు జాతీయ పురస్కారాలను తన ఖాతాలో వేసుకుంది. తెలుగు సినిమాలు మొత్తం తొమ్మిది విభాగాల్లో అవార్డులు సాధించగా, కొత్త దర్శకుడు, తాజా నటీనటులతో వచ్చిన ఈ చిత్రం రెండు విభాగాల్లో గుర్తింపు పొందడం ప్రత్యేకంగా నిలిచింది. పదకొండు మంది బాల్య స్నేహితుల చుట్టూ కథ సాగుతుంది. అమలాపురం ప్రాంతంలోని గ్రామీణ నేపథ్యంలో బాల్య జ్ఞాపకాలు, స్నేహం, చదువు, సామాజిక విభజనలు, గ్రామ జాతర, స్థానిక రాజకీయాల ప్రభావాన్ని దర్శకుడు ఆవిష్కరించారు. కొత్త ముఖాలు అయినప్పటికీ పాత్రల ప్రపంచంలో సహజంగా కలిసిపోయారని, గోదావరి మాండలికంలోని సంభాషణలు, గ్రామీణ వాతావరణం చిత్రానికి బలంగా నిలిచాయని సమీక్షలు పేర్కొన్నాయి. అవార్డు అనంతరం నిర్వహించిన కార్యక్రమంలో నిహారిక మాట్లాడుతూ, చిత్రబృందంలో ఎక్కువ మంది గ్రామాలు, చిన్న పట్టణాల నుంచి సినిమా కలలతో వచ్చినవారేనని తెలిపారు. పలువురు నటీనటులు, సాంకేతిక నిపుణులకు ఇదే తొలి చిత్రమని పేర్కొన్నారు. సినిమా నిర్మించడం మాత్రమే కాకుండా ప్రేక్షకుల వద్దకు తీసుకెళ్లడమూ పెద్ద సవాలుగా మారిందని, గ్రామాల్లో పర్యటిస్తూ ప్రచారం నిర్వహించినట్లు చెప్పారు. దర్శకుడు యదు వంశీ ప్రారంభం నుంచే ఈ సినిమా జాతీయ అవార్డు సాధిస్తుందని నమ్మారని నిహారిక గుర్తుచేశారు. మొదట అది తన లక్ష్యం కాకపోయినా, చిత్ర ప్రయాణంలో దర్శకుడి కల మొత్తం బృందం కలగా మారిందని తెలిపారు. ఉత్తమ మేకప్‌ పురస్కారం సాధించిన పి.రవికుమార్‌ను కూడా ఆమె ప్రత్యేకంగా అభినందించారు.