అన్నయ్యే నా ఏకైక హీరో.. చిరంజీవికి పవన్ కల్యాణ్ భావోద్వేగ శుభాకాంక్షలు

మెగాస్టార్ చిరంజీవి పుట్టినరోజు సందర్భంగా డిప్యూటీ సీఎం పవన్ కల్యాణ్ చేసిన భావోద్వేగ సందేశం అభిమానులను ఆకట్టుకుంటోంది. అన్నయ్య చిరంజీవితో తనకున్న అనుబంధాన్ని గుర్తు చేసుకుంటూ పవన్ సోషల్ మీడియా ఎక్స్ వేదికగా ప్రత్యేక పోస్టు చేశారు. చిరంజీవి గురించి తలుచుకోవడం తనకు ఎంతో ఆనందాన్ని ఇస్తుందని పవన్ పేర్కొన్నారు. పాత జ్ఞాపకాలను గుర్తు చేసుకున్నప్పుడు ఎన్నో మధురమైన సంఘటనలు గుర్తుకు వస్తాయని తెలిపారు. కాలేజీ విద్యార్థిగా ఉన్న సమయంలోనే ప్రపంచంలోనే గొప్ప వ్యక్తితో నడుస్తున్న అనుభూతి కలిగేదని పవన్ చెప్పారు. చిరంజీవి యువకుడిగా ఉన్నప్పటి వ్యక్తిత్వం, స్టైల్‌, క్రమశిక్షణ తనను ఆకట్టుకున్నాయని వివరించారు. సినిమా హీరో కాకముందే చిరంజీవి తనకు హీరోలాంటి వ్యక్తి అని పవన్ అన్నారు. అన్నయ్య పెళ్లి సమయంలో ఆయన తమకు దూరమైపోతారేమోనని ఆందోళన చెందిన విషయాన్ని గుర్తు చేసుకున్నారు. ఆ తర్వాత చిరంజీవి, ఆయన భార్య తనపై చూపిన ప్రేమ, ఆప్యాయతలను ఎప్పటికీ మరిచిపోలేనని తెలిపారు. చిరంజీవి సినీ ప్రయాణంలో ఎదుర్కొన్న కష్టాలను కూడా పవన్ గుర్తు చేసుకున్నారు. షూటింగ్‌ల కోసం గంటల తరబడి కష్టపడటం, ప్రతికూల పరిస్థితుల్లోనూ పనిచేయడం తాను దగ్గరుండి చూశానని చెప్పారు. చిరంజీవి తన కుటుంబానికే కాకుండా స్నేహితులు, నిర్మాతలు, చిత్ర పరిశ్రమకు ఎంతో సహకారం అందించారని పవన్ పేర్కొన్నారు. దక్షిణాది, హిందీ చిత్ర పరిశ్రమల మధ్య సాంస్కృతిక వారధిగా చిరంజీవి కీలక పాత్ర పోషించారని అన్నారు. భారతీయ సినిమాను చిరంజీవి ఎప్పుడూ విశ్వసించారని పవన్ తెలిపారు. హిందీలో కూడా సినిమాలు చేసి దేశవ్యాప్తంగా గుర్తింపు పొందారని పేర్కొన్నారు. చిరంజీవి సినీ ప్రస్థానంలో అనేక విజయాలు సాధించడంతో పాటు పద్మవిభూషణ్ వంటి అత్యున్నత పౌర పురస్కారాన్ని అందుకున్నారని పవన్ గుర్తు చేశారు. ఇటీవల ఆరోగ్య సమస్యల నుంచి కోలుకుని తిరిగి తన పనుల్లో చురుగ్గా పాల్గొంటున్న చిరంజీవి పట్టుదలను పవన్ ప్రశంసించారు. విశ్రాంతి లేకుండా పనిచేసే వ్యక్తిత్వమే ఆయనను ప్రత్యేకంగా నిలబెడుతోందని అన్నారు. "చిరంజీవి మా ప్రియమైన మెగాస్టార్.. నా ఏకైక హీరో" అంటూ పవన్ తన సందేశాన్ని ముగించారు. చిరంజీవి పుట్టినరోజు సందర్భంగా సినీ ప్రముఖులు, అభిమానులు సోషల్ మీడియా ద్వారా శుభాకాంక్షలు తెలియజేస్తున్నారు.