సీనియర్ నటి షావుకారు జానకి కన్నుమూత.. ముగిసిన సినీ ప్రస్థానం

తెలుగు, తమిళ సినీ పరిశ్రమల్లో తనకంటూ ప్రత్యేక గుర్తింపు సంపాదించుకున్న సీనియర్ నటి ‘షావుకారు’ జానకి కన్నుమూశారు. ఆమె వయసు 94 సంవత్సరాలు. కొంతకాలంగా వృద్ధాప్య సమస్యలు, అనారోగ్యంతో బాధపడుతున్న జానకి చెన్నైలోని ఓ ప్రైవేటు ఆసుపత్రిలో చికిత్స పొందుతూ శుక్రవారం మధ్యాహ్నం 1.59 గంటలకు తుదిశ్వాస విడిచారు. జానకి మరణంతో సినీ రంగంలో విషాదం నెలకొంది. ఆమె భౌతికకాయాన్ని చెన్నైలోని తేనాంపేటలో ఉన్న స్వగృహంలో ఉంచారు. సినీ ప్రముఖులు, అభిమానులు ఆమెను చివరిసారి చూసి నివాళులు అర్పించేందుకు అవకాశం కల్పించారు. కుటుంబ సభ్యుల వివరాల ప్రకారం, శనివారం మధ్యాహ్నం వరకు భౌతికకాయాన్ని ఇంటి వద్దే ఉంచి, ఆదివారం అంత్యక్రియలు నిర్వహించనున్నారు. షావుకారు జానకి తెలుగు సినిమా చరిత్రలో చెరగని ముద్ర వేసిన నటీమణుల్లో ఒకరు. తన సహజ నటన, భావ వ్యక్తీకరణతో ఎన్నో పాత్రలకు ప్రాణం పోశారు. ఆమె నటనా ప్రయాణం అనేక దశాబ్దాల పాటు కొనసాగింది. జానకికి ఇద్దరు కుమార్తెలు యజ్ఞప్రభ, సచీరావ్‌, కుమారుడు వెంకటరమణ శంకరమంచి ఉన్నారు. ఆమె కుటుంబంలో నలుగురు మనవలు, నలుగురు మునిమనవళ్లు ఉన్నారు. మనవరాలు వైష్ణవి అరవింద్‌ సినీ రంగంలో కొనసాగుతున్నారు. షావుకారు జానకి సోదరి కృష్ణకుమారి కూడా తెలుగు చిత్ర పరిశ్రమలో ప్రముఖ నటిగా పేరు తెచ్చుకున్నారు. ఒకే కుటుంబం నుంచి వచ్చిన ఈ ఇద్దరు సోదరీమణులు తమ నటనతో ప్రేక్షకుల అభిమానాన్ని పొందారు. జానకి సినీ ప్రస్థానం తెలుగు, తమిళ ప్రేక్షకులకు ఎంతో దగ్గరైంది. కుటుంబ కథా చిత్రాలు, భావోద్వేగ పాత్రలు, సహాయక పాత్రల్లో ఆమె ప్రత్యేక గుర్తింపు పొందారు. తన కెరీర్‌లో అనేక మంది ప్రముఖ నటులు, దర్శకులతో కలిసి పనిచేసిన జానకి చిత్ర పరిశ్రమలో గౌరవాన్ని సంపాదించారు. ఆమె మరణ వార్తతో సినీ ప్రముఖులు, అభిమానులు తీవ్ర దిగ్భ్రాంతి వ్యక్తం చేస్తున్నారు. సోషల్ మీడియా వేదికగా పలువురు ప్రముఖులు ఆమెకు నివాళులు అర్పిస్తూ, తెలుగు సినిమా రంగానికి ఆమె చేసిన సేవలను గుర్తు చేసుకుంటున్నారు. దశాబ్దాల పాటు ప్రేక్షకులను అలరించిన షావుకారు జానకి ఇక లేరన్న వార్త సినీ అభిమానులకు తీరని లోటుగా మారింది.