RAW NTRతో సంబంధం లేదన్న ఎన్టీఆర్ కార్యాలయం.. అధికారిక సమాచారాన్నే నమ్మాలని సూచన

యంగ్ టైగర్ ఎన్టీఆర్ పేరుతో ప్రచారం జరుగుతున్న RAW NTR సంస్థపై ఆయన కార్యాలయం కీలక ప్రకటన విడుదల చేసింది. ఆ సంస్థతో తమకు ఎలాంటి సంబంధం లేదని స్పష్టం చేస్తూ, అధికారిక సమాచారం విషయంలో అభిమానులకు ప్రత్యేక సూచనలు చేసింది. ఎన్టీఆర్ పేరుతో ప్రకటనలు, సేవా కార్యక్రమాలు, ప్రజా సంక్షేమ కార్యక్రమాలు నిర్వహిస్తున్నట్లు ప్రచారం చేస్తున్న RAW NTR సంస్థతో తమకు ఎలాంటి సంబంధం లేదని ఎన్టీఆర్ కార్యాలయం అధికారికంగా ప్రకటించింది. "RAW NTR" పేరుతో జరుగుతున్న కార్యకలాపాలు తమ దృష్టికి వచ్చాయని, అయితే ఆ సంస్థకు ఎన్టీఆర్ తరఫున ప్రాతినిధ్యం వహించే హక్కు లేదని స్పష్టం చేసింది. ప్రజల్లో తప్పుడు అభిప్రాయం కలిగించేలా ఆ సంస్థ వ్యవహరిస్తోందని పేర్కొంది. ఎన్టీఆర్‌కు సంబంధించిన సేవా కార్యక్రమాలు, సామాజిక కార్యక్రమాలు, ప్రజా సంక్షేమ కార్యక్రమాల వివరాలను కేవలం ఎన్టీఆర్ లేదా ఆయన అధికారిక బృందం మాత్రమే వెల్లడిస్తుందని ప్రకటనలో తెలిపింది. అనధికారిక వ్యక్తులు లేదా సంస్థల ద్వారా జరిగే ప్రచారాన్ని పరిగణనలోకి తీసుకోవద్దని అభిమానులకు సూచించింది. సోషల్ మీడియా, డిజిటల్ వేదికల్లో ధ్రువీకరణ లేని సమాచారాన్ని షేర్ చేయకుండా అధికారిక వర్గాలు విడుదల చేసే సమాచారాన్నే విశ్వసించాలని కోరింది. ఇటీవల సోషల్ మీడియాలో RAW NTR పేరుతో పలు కార్యక్రమాలు, సేవా కార్యక్రమాలకు సంబంధించిన పోస్టులు వైరల్ కావడంతో ఈ వివరణ ఇచ్చినట్లు తెలుస్తోంది. అధికారిక ప్రకటనతో ఈ అంశంపై వస్తున్న వదంతులకు తెరపడుతుందని ఎన్టీఆర్ కార్యాలయం భావిస్తోంది. ఇదిలా ఉండగా ఎన్టీఆర్ ప్రస్తుతం దర్శకుడు ప్రశాంత్ నీల్ తెరకెక్కిస్తున్న భారీ యాక్షన్ చిత్రం 'డ్రాగన్' షూటింగ్‌లో బిజీగా ఉన్నారు. ఈ చిత్రం వచ్చే ఏడాది జూన్ 11న విడుదల కానుంది. ఆ తర్వాత దర్శకుడు త్రివిక్రమ్ శ్రీనివాస్‌తో ఎన్టీఆర్ మరో భారీ చిత్రంలో నటించనున్నారు. కార్తికేయుని కథాంశంతో రూపొందనున్న ఈ చిత్రానికి 'గాడ్ ఆఫ్ వార్' అనే టైటిల్ ప్రచారంలో ఉంది. అయితే చిత్రబృందం నుంచి దీనిపై ఇంకా అధికారిక ప్రకటన వెలువడలేదు.