ట్రెడ్‌మిల్ మోటార్‌లో బంగారం.. చైనా స్మగ్లింగ్ గ్యాంగ్ అరెస్ట్

ముంబైలో భారీ బంగారం స్మగ్లింగ్ వ్యవహారం బయటపడింది. వాణిజ్య దిగుమతుల పేరుతో బంగారాన్ని అక్రమంగా తరలిస్తున్న ముఠాను డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ) అధికారులు గుర్తించారు. చైనా జాతీయులు భారతీయ సహచరులతో కలిసి ఈ స్మగ్లింగ్‌కు పాల్పడినట్లు దర్యాప్తులో వెల్లడైంది. డీఆర్ఐ ముంబై జోనల్ యూనిట్ అధికారులు హాంకాంగ్ నుంచి ముంబై ఎయిర్ కార్గో కాంప్లెక్స్‌కు వచ్చిన ఓ సరుకును తనిఖీ చేశారు. ఈ తనిఖీల్లో ట్రెడ్‌మిల్ మోటార్‌లో అత్యంత చాకచక్యంగా దాచిన 691.870 గ్రాముల 24 క్యారెట్ల బంగారం బయటపడింది. స్వాధీనం చేసుకున్న బంగారం విలువ సుమారు రూ.1.10 కోట్లుగా అధికారులు అంచనా వేశారు. ఈ కేసులో ఓ చైనా జాతీయుడితో పాటు దిగుమతి సంస్థను నిర్వహిస్తున్న మరో వ్యక్తిని కస్టమ్స్ చట్టం-1962 కింద అరెస్ట్ చేశారు. బంగారం స్వాధీనం అనంతరం ముంబై, చెన్నై, తిరువళ్లూరు, చెంగల్పట్టు ప్రాంతాల్లో డీఆర్ఐ అధికారులు తదుపరి సోదాలు నిర్వహించారు. ఇదిలా ఉండగా, ఢిల్లీలో కూడా కస్టమ్స్ అధికారులు భారీ విలువైన బంగారు ఆభరణాన్ని స్వాధీనం చేసుకున్నారు. విదేశాల నుంచి అక్రమంగా తరలిస్తున్న బంగారం, విలువైన ఆభరణాలపై అధికారులు ప్రత్యేక నిఘా కొనసాగిస్తున్నారు.