పసిడిలో మరింత కరెక్షన్‌.. దసరా నాటికి భారీగా తగ్గే ఛాన్స్‌!

బులియన్‌ మార్కెట్లో బంగారం ధరల పతనం కొనసాగుతోంది. ఈ ఏడాది మార్చి నుంచి ఇప్పటివరకు దేశీయ మార్కెట్లో పసిడి ధర సుమారు 25 శాతం తగ్గగా, గత వారంలోనే దాదాపు 3 శాతం నష్టపోయింది. ఢిల్లీ మార్కెట్లో 10 గ్రాముల 24 క్యారెట్ల బంగారం రూ.1.45 లక్షల వద్ద ట్రేడవుతోంది. రానున్న రోజుల్లో కూడా ధరలు మరింత తగ్గే అవకాశం ఉందని మార్కెట్‌ వర్గాలు అంచనా వేస్తున్నాయి. అమెరికా–ఇరాన్‌ మధ్య ఉద్రిక్తతలు పెరగడంతో అంతర్జాతీయంగా ముడి చమురు ధరలు భారీగా పెరిగాయి. దీంతో ద్రవ్యోల్బణం పెరుగుతుందనే ఆందోళనలు నెలకొన్నాయి. ఈ నేపథ్యంలో అమెరికా ఫెడరల్‌ రిజర్వ్‌ వడ్డీ రేట్లను పెంచే అవకాశం ఉందనే అంచనాలు బలపడుతున్నాయి. వడ్డీ రేట్లు పెరిగితే పెట్టుబడిదారులు బంగారం కంటే అధిక వడ్డీ ఆదాయం అందించే అమెరికా ప్రభుత్వ బాండ్ల వైపు మళ్లే అవకాశం ఉంది. అంతర్జాతీయ బులియన్‌ మార్కెట్లో షార్ట్‌ సెల్లింగ్‌ కూడా పెరుగుతోంది. బంగారం ధరలు మరింత తగ్గుతాయనే అంచనాలతో కొంతమంది మదుపరులు తమ వద్ద ఉన్న పసిడిని విక్రయిస్తున్నారు. ముడి చమురు ధరలు మరింత పెరిగితే బంగారంపై అమ్మకాల ఒత్తిడి కూడా పెరిగే అవకాశం ఉందని మార్కెట్‌ విశ్లేషకులు చెబుతున్నారు. ప్రస్తుతం ఫ్యూచర్స్‌ మార్కెట్లోనూ బంగారం ధరలు తగ్గుముఖం పట్టాయి. దసరా, దీపావళి నాటికి దేశీయ మార్కెట్లో 10 గ్రాముల బంగారం ధర రూ.1.30 లక్షల నుంచి రూ.1.35 లక్షల మధ్యకు చేరే అవకాశం ఉందని మార్కెట్‌ విశ్లేషకులు అంచనా వేస్తున్నారు. అయితే అంతర్జాతీయ పరిణామాలు, ముడి చమురు ధరలు, అమెరికావడ్డీ రేట్ల నిర్ణయాలు బంగారం ధరలపై కీలక ప్రభావం చూపే అవకాశం ఉంది.