వేగంగా గ్రీన్‌ఫీల్డ్‌ హైవే.. బెంగళూరు–విజయవాడ ప్రయాణం సగానికి

బెంగళూరు–కడప–విజయవాడ ఎకనమిక్‌ కారిడార్‌లో భాగంగా నిర్మిస్తున్న కోడూరు–ముప్పవరం యాక్సెస్‌ కంట్రోల్‌ గ్రీన్‌ఫీల్డ్‌ హైవే పనులు వేగంగా సాగుతున్నాయి. భారతమాల పరియోజన తొలి దశలో రూ.14 వేల కోట్ల వ్యయంతో నిర్మిస్తున్న ఈ ప్రాజెక్టును వచ్చే ఏడాది మధ్య నాటికి అందుబాటులోకి తీసుకురావాలని అధికారులు లక్ష్యంగా పెట్టుకున్నారు. శ్రీసత్యసాయి జిల్లా కోడూరు నుంచి ప్రారంభమయ్యే ఈ హైవే ప్రకాశం జిల్లా ముప్పవరం వరకు 343.24 కిలోమీటర్ల మేర విస్తరించనుంది. అనంతరం చెన్నై–కోల్‌కతా జాతీయ రహదారి ద్వారా విజయవాడకు అనుసంధానం కల్పిస్తారు. ఈ ప్రాజెక్టు పూర్తయితే ప్రస్తుతం 12-13 గంటలు పడుతున్న బెంగళూరు–విజయవాడ ప్రయాణం 6-7 గంటలకు తగ్గే అవకాశం ఉంది. దీనివల్ల సరకు రవాణా వేగవంతం కావడంతో పాటు పారిశ్రామిక, వాణిజ్య రంగాలకు పెద్ద ఊతం లభించనుంది. శ్రీసత్యసాయి, వైఎస్సార్‌ కడప, నెల్లూరు, ప్రకాశం జిల్లాల్లో నిర్మాణ పనులు వేగంగా కొనసాగుతున్నాయి. పలు ప్రాంతాల్లో రహదారి నిర్మాణం పూర్తికాగా, వంతెనలు, రైల్వే ఓవర్‌బ్రిడ్జిలు, ఇంటర్‌చేంజ్‌లు, సొరంగాల పనులు కొనసాగుతున్నాయి. మొత్తం ఏడు సొరంగాల్లో నెల్లూరు జిల్లా సరిహద్దులో నిర్మిస్తున్న 3.67 కిలోమీటర్ల సొరంగం అత్యంత పెద్దది. కొన్ని ప్రాంతాల్లో భూసేకరణ సమస్యల కారణంగా స్వల్ప జాప్యం ఉన్నప్పటికీ, మిగిలిన ప్యాకేజీల్లో పనులు వేగంగా జరుగుతున్నాయి. నిర్ణయించిన గడువులోపు ప్రాజెక్టును పూర్తి చేయడానికి అధికారులు ప్రత్యేక చర్యలు తీసుకుంటున్నారు.